មិនមែនតាមចែចូវត្រឹមមួយខែពីរដូចគេ តែនេះចូល ២ ទៅ ៣ ឆ្នាំមកហើយ សម្រាប់ករណី Kylian Mbappe ជាមួយភាគីក្លឹបចង់បាន Real Madrid ទោះយ៉ាងណាទីបញ្ចប់ ក៏ចប់ដោយភាពបរិបូរណ៍ ឬអ្នកនិយមទស្សនារឿងភាគ ហៅថា ‘Happy Ending’។
តាមរបាយការណ៍គួរឲ្យទុកចិត្តចុងក្រោយ លែងក្រឡាស់សម្តីដូចមុន គឺកីឡាករបារាំងនឹងពុំមានការព្រមព្រៀងបន្តកុងត្រាថ្មីតទៅទៀតទេ រវាងភាគីក្លឹបមេ Paris Saint-Germain ពោលនឹងចាកចេញក្នុងលក្ខខណ្ឌឥតតម្លៃខ្លួន នៅបញ្ចប់រដូវកាលខាងមុខ ទៅកាន់ក្លឹបអធិរាជស Real Madrid នៅឯប្រទេសអេស្ប៉ាញ។
ដូចគ្នាការផ្ទេរទៅ Arsenal ឬ Liverpool ក៏សម្រេចនឹងអាចទៅរួច ហើយនេះតាម Foot Mercato ចុះផ្សាយ ប្រធានក្លឹបលោក Florentino Perez បានជូនដំណឹងទៅសមាជិកក្លឹប Madrid រួចរាល់អស់ហើយ ជាពិសេសកីឡាកររួមបន្ទប់ផ្លាស់សំលៀកបំពាក់ ថាចំណូលថ្មី Mbappe ពិតជាឆ្លើយ “Yes” រួចរាល់ ពោលរង់ចាំតែថ្ងៃប្រកាសដំណឹងផ្លូវការតែប៉ុណ្ណោះឯង។
សូម្បីតែ Aurelien Tchouameni ក៏បង្ហាញតម្រុយវិជ្ជមានផងដែរ ដ្បិតគេជាកីឡាកររួមសញ្ជាតិជាមួយ Mbappe ដឹកដៃគ្នាឆ្លងទៅវគ្គផ្តាច់ព្រ័ត្រកាល World Cup ២០២២។ វត្តមាននៃការមកដល់របស់ខ្សែប្រយុទ្ធវ័យ ២៥ ឆ្នាំ នឹងសម្រេចទទួលបានអាវលេខ ៧ ឬលេខ ១០ ស៊ីសងលើការចង់បានរបស់គេ ត្រង់សព្វថ្ងៃនៅ PSG ប្រើលេខ ៧ ហើយនៅជម្រើសជាតិមាន់គកបារាំង ប្រើលេខ ១០ សុទ្ធជាលេខសំណាង។ យ៉ាងណាបើចង់ស្នង Ronaldo ជា idol ក្នុងក្តីស្រមៃពិតៗ គឺប្រាកដនឹងយកលេខ ៧ នោះឯង តម្រូវដកចេញពីម្ចាស់សព្វថ្ងៃជា Vinicius Jr។
បន្តទៅដល់ថ្លៃឈ្នួលផ្តល់ឲ្យសម្រាប់កូនអណ្តើកតូចខាងលើបន្តិច អធិរាជស គ្រោងផ្តល់ឲ្យកុងត្រាថ្មីសន្លាង ៥ ឆ្នាំ ហើយក្នុងមួយឆ្នាំ Mbappe ទទួលបាន ៥០ លានអឺរ៉ូ ល្មមនឹងរុញឈ្មោះរបស់គេក្លាយជាកីឡាករស៊ីថ្លៃប្រចាំក្លឹប ដូចគ្នានឹងប្រចាំក្របខ័ណ្ឌ La Liga។ បើគិតឲ្យជ្រៅ ទៅឲ្យឆ្ងាយ ជីកកាយចេញជាវិនាទី គឺក្នុងមួយខែ ទទួលបាន ៤,២ លានអឺរ៉ូ មួយសប្តាហ៍ទទួលបាន ៩៦១ ៥០០ អឺរ៉ូ មួយថ្ងៃទទួលបាន ១៣៧ ៣៦០ អឺរ៉ូ មួយម៉ោងទទួលបាន ៥ ៧២៣ អឺរ៉ូ មួយនាទីទទួលបាន ៩៥,៤០ អឺរ៉ូ និងមួយវិនាទី ទទួលបាន ១,៥៨ អឺរ៉ូ។ ក៏មានន័យថា ម្ចាស់ជើងឯក World Cup សម័យកាល ២០១៨ អាចធ្លាក់លុយចូលហោប៉ៅប្រមាណជិត ៧ ០០០ រៀលលុយខ្មែររៀងរាល់វិនាទី។
នេះបើធៀបនឹងកីឡាករកំពុងផ្ទុះការចាប់អារម្មណ៍សព្វថ្ងៃ នៅ Bernabeu ក៏ជា Top Scorer ប្រចាំលីគ Jude Bellingham មួយអាទិត្យគេរកបានត្រឹម ២៥០ ០០០ អឺរ៉ូប៉ុណ្ណោះ ដែលមានន័យទាបជាង Mbappe គុណជិតជា ៣ ជា ៤ ឯណោះ។
រំឭកដែរថា មុនដំណើរចាកចេញពីក្លឹបនៅដីកំណើត កីឡាករជំនាញបញ្ចប់ទីជើងស្តាំ គេអាចរកបានដល់ទៅ ២៤៣ គ្រាប់ ជាប់ឈ្មោះជា Top Scorer ប្រចាំប្រវត្តិសាស្រ្ត PSG នៅអាយុត្រឹមតែ ២៥ ឆ្នាំ។ បើដាក់គោលដៅប្រជែងនឹងកំណត់ត្រាថ្មីនៅ Madrid អាចជាពិបាកនិងទាមទារពេលយូរ ជាក់ស្តែង CR7 ជាម្ចាស់ មិនទាន់មានអ្នកបំបែក កំពុងកាន់កាប់នៅតួលេខ ៤៥០ គ្រាប់៕
ប្រភព៖ បរទេស