UEFA នឹងមានប្រធានថ្មីក្រោយឆ្នាំ 2027 បន្ទាប់ពីលោក Aleksander Ceferin បានសម្រេចចិត្តមិនឈរឈ្មោះនៅអាណត្តិថ្មីដេីម្បីគ្រប់គ្រងស្ថាប័នបាល់ទាត់អឺរ៉ុប។សមាជិក UEFA បានអនុម័តការផ្លាស់ប្តូរលក្ខន្តិកៈដែលនឹងផ្តល់ឱកាសឱ្យ Ceferin បន្តធ្វើជាប្រធាន UEFA រហូតដល់ឆ្នាំ 2031 ដែលនឹងក្លាយជាអាណត្តិទីបួនដែលមិនធ្លាប់មានពីមុនមក។
យ៉ាងណាមិញ ក្រោយពីទទួលបានភ្លើងខៀវជាផ្លូវការឱ្យកាន់អំណាចភ្លាម Ceferin បានបង្ហើបថាគាត់មានបំណងចាកចេញមុនតំណែងក្នុងរយៈពេលបីឆ្នាំ។បុរសជនជាតិស្លូវេនីអាយុ 56 ឆ្នាំបាននិយាយនៅក្នុងសន្និសីទសារព័ត៌មានបន្ទាប់ពីសភាថា៖
“ខ្ញុំបានសម្រេចចិត្តកាលពីប្រាំមួយខែមុនថាខ្ញុំនឹងមិនបន្តទៀតទេ។
ហេតុផលគឺពេលខ្លះ គ្រប់ស្ថាប័នទាំងអស់ត្រូវការឈាមថ្មី ប៉ុន្តែភាគច្រើនក៏ដោយសារតែខ្ញុំនៅឆ្ងាយពីគ្រួសារអស់រយៈពេលប្រាំពីរឆ្នាំហើយ។ខ្ញុំមានចេតនាមិនចង់បង្ហាញពីគំនិតរបស់ខ្ញុំពីមុនទេ ព្រោះដំបូងខ្ញុំចង់ឃើញមុខពិតរបស់មនុស្សមួយចំនួន ហើយខ្ញុំបានឃើញវាហេីយ។
ខ្ញុំមានជីវិតដ៏ស្រស់ស្អាតក្នុងបាល់ទាត់ ខ្ញុំមានជីវិតដ៏ស្រស់ស្អាតនៅក្រៅបាល់ទាត់ផងដែរ“៕