ថាកីឡាករដែលរត់ចុះឡើងលើទីលានទៅ ងាយនឹងប៉ះទង្គិចកើតការពិន័យទទួលកាត តែនេះដល់ថ្នាក់អ្នកចាត់ការ Jose Mourinho ក៏បានកើតជាទម្លាប់ញឹកញាប់មួយដែរ ចាប់តាំងការផ្ទេរមកដឹកនាំក្លឹប AS Roma នៅឯក្របខ័ណ្ឌអ៊ីតាលី Serie A។
ចាប់តាំងការមកដល់នៅរដូវក្តៅ ឆ្នាំ ២០២១ ហែលកាត់ការដឹកនាំសរុប ១៣៦ ប្រកួត ឈ្នះ ៦៨ ស្មើ ៣០ ចាញ់ ៣៨ ក៏ឃើញថា គ្រូជាប់រហស្សនាម “Special One” ពិតជាពិសេសដូចគេថាមែន តែនេះពិសេសដល់ខាតប្រយោជន៍ខ្លួនឯង។ តើអ្នកដឹងទេ សរុបកាតក្រហម Mourinho ទទួលបានពីអាជ្ញាកណ្តាល មានដល់ទៅ ៦ លើក នេះវាជាតួលេខច្រើនជាងកីឡាករណាៗទាំងអស់នៅ Serie A ក្នុងកំឡុងពេលវេលាដែលលោកឈរជើង។
៦) ទល់ក្លឹប Real Betis
បើកឆាកប្រកួតមិត្តភាពកាលពីដឹកនាំ Roma ថ្មីថ្មោង ក៏អតីតគ្រូ MU កើតការខឹងសម្បាដល់ទទួលកាតក្រហមភ្លែត។ ជំនួបទល់ក្លឹបអេស្ប៉ាញមុនបើករដូវកាល នៅកៀកពាក់កណ្តាលតង់ទីពីរ Mourinho កើតការមិនពេញចិត្តដែលអាជ្ញាកណ្តាលមើលមិនឃើញទង្វើប្រើដៃរុញបាល់បញ្ចូលទីរបស់កីឡាករ Real Betis ហើយបែរគ្មានការពិន័យ។
ដោយសារផ្ទុះការតវ៉ាខ្លាំង អាជ្ញាកណ្តាលបែរមកលើកកាតលឿងផងក្រហមផងបន្តបន្ទាប់ ដេញអស់កីឡាករ Roma ៣ រូបក្នុងល្បាក់តែប៉ុន្មាននាទីបន្ទាប់ ហើយ Mourinho ជាគ្រូឈរក្រៅទីលាន ដែលរត់មកស្រែកតវ៉ាក៏ត្រូវពិន័យកាតក្រហមដូចគ្នា។
៥) ទល់ក្លឹប Verona
កំឡុងប្រកួតស្មើ ២-២ ទល់ Verona នៅ Serie A កំឡុងខែកុម្ភៈ ឆ្នាំ ២០២២ គ្រូសញ្ជាតិព័រទុយហ្គាល់បានប្រើកាយវិការនិងពាក្យសម្តីមិនសមរម្យ ទៅលើអាជ្ញាកណ្តាលលោក Luca Pairetto។ ចេតនារបស់ អ្នកចាត់ការសារនោះ គឺហាក់ចង់ផ្តោតទៅរឿងអាស្រូ.វពុករលួ-យរបស់ឪពុក Pairetto ជាលោក Pierluigi កាលឆ្នាំ ២០០៦ បង្កើតភាពកង្វក់មកលើបាល់ទាត់អ៊ីតាលី។ នៅចុងម៉ោងទៅហើយ Mourinho បែររងពិន័យកាតក្រហមតម្រូវឲ្យព្យួរឈ្មោះពីការដឹកនាំប្រកួតបន្តបន្ទាប់។
៤) ទល់ Atalanta
ក្នុងឆ្នាំដដែលនៅ Serie A សារនេះ ទល់ក្លឹប Atalanta កំឡុងនាទី ៥៦ លើទីលានប្រកួត Mourinho រត់ចូលទីលានតវ៉ាអាជ្ញាកណ្តាលរឿងមិនព្រមផ្តល់បាល់ពិន័យ ១១ ម៉ែត្រមកខាងកីឡាករខ្លួន បន្ទាប់ការប៉ះទង្គិចពីសំណាក់ក្លឹបគូប្រជែង។
៣) ទល់ក្លឹប Cremonese
នៅប្រកួតលីគកំពូលអ៊ីតាលី ល្បាក់ចុងខែកុម្ភៈ ឆ្នាំ ២០២៣ Mourinho បានអះអាងថា ពេលនោះដោយសារមន្រ្តីអាជ្ញាកណ្តាលទី ៤ ប្រើពាក្យពេចន៍មិនសមរម្យមកលើខ្លួនមុន ទើបនាំឲ្យកើតការប៉ះពាក្យប៉ះសម្តី ដល់ខ្លួនត្រូវរងពិន័យកាតក្រហម។ កំហុសរបស់អ្នកចាត់ការវ័យ ៦០ ឆ្នាំ ទទួលការព្យួរឈ្មោះ ២ ប្រកួត និងពិន័យប្រាក់ ១០ ០០០ អឺរ៉ូ។
២) ទល់ក្លឹប Monza
នៅចុងខែតុលាឆ្នាំ ដដែលបិទការប្រកួត Roma ឈ្នះទៅហើយ តែ Mourinho បានប្រើកាយវិការចុះឡើងសំដៅទៅតំបន់កៅអីបម្រុងខាងគូប្រជែងនៃក្លឹប Monza។ ទោះមិនបានប្រើប្រាស់ពាក្យពេចន៍អាក្រក់ណាមួយ តែកាយវិការនោះ ត្រូវបានអាជ្ញាកណ្តាលរាប់ចូលជាកំហុស ហើយលើកកាតក្រហមឥតស្ទាក់ស្ទើរ។
១) ទល់ Atalanta
នេះមកប៉ះ Atalanta ម្តងទៀតហើយ នៅប្រកួតស្មើ ១-១ កាលពីថ្ងៃទី ០៨ មករាម្សិលមិញ។ ត្រង់ដល់ម៉ោងកៀកចប់ការប្រកួត Mourinho បានបង្ហាញភាពខឹងសម្បា ទៅលើអាជ្ញាកណ្តាលដែលកាត់ក្តីមិនយុត្តិធម៌មកលើកីឡាករ Romelu Lukaku របស់ខ្លួន។ ឥតគិតយូរ អាជ្ញាកណ្តាលបានលើកកាតក្រហម សម្រេចព្យួរឈ្មោះមិនឲ្យអ្នកចាត់ការខាងលើមកឈរបញ្ជាក្លឹបនៅប្រកួតសំខាន់បន្ទាប់ទល់ AS Roma នាឯពាក់កណ្តាលខែ៕
ប្រភព៖ បរទេស