ជឿថាបងប្អូនយើងភាគច្រើនធ្លាប់តែបានដឹង ពាក់ព័ន្ធទិន្នន័យអត្តពលិកស៊ីថ្លៃខ្ពស់បំផុតក្នុងអាជីពបាល់ទាត់ ដោយឡែកងាកមកបាល់ទះ រាប់ជារួមទូទាំងសកលលោក ប្រហែលមានអ្នកដឹងតិចណាស់។ ក្នុងវីដេអូនេះ PEAK Sports ក៏ជឿជាក់បងប្អូនមួយចំនួនធំ ប្រាកដមានការភ្ញាក់ផ្អើលមិនខាន ជុំវិញការបង្ហាញឲ្យស្គាល់នូវ កីឡាករ-កីឡាការនីទាំង ១០ ទទួលបានប្រាក់ឈ្នួលខ្ពស់បំផុតពីអាជីពបាល់ទះ៖
១០) Gyorgy Grozer (ចរហ្គី ក្រូសឺ) – នេះជាដៃស្មាត់វ័យចំណាស់មួយរបស់អាល្លឺម៉ង់ ដោយចាប់ប្រលូកក្នុងអាជីពតាំងឆ្នាំ ១៩៩២ ហែលកាត់ក្លឹបផ្សេងគ្នាដល់ទៅ ១៦ ខណៈសព្វថ្ងៃឈរឈ្មោះនៅទ្រនំ Arkas Spor ក្នុងប្រទេសតួកគី។ ស្ថិតនៅវ័យ ៣៨ ឆ្នាំ កម្ពស់ ២ ម៉ែត្រ ទម្ងន់ ១០២ គីឡូក្រាម ទទួលបានចំណូល ៨៧០ ០០០ ដុល្លារ/រដូវកាល។
៩) Aleksandar Atanasijevic (អាលេកសាន់ដា អាតាណាស៊ីចេវិក) – ងាកមកស្មាត់ស្តាំកម្ពស់បាន ២ ម៉ែត្ររូបនេះវិញ គឺជាកីឡាករស៊ីថ្លៃបំផុតរបស់ស៊ែប៊ី ហើយធ្លាប់សម្រេចសមិទ្ធផលធំ ដូចការឈ្នះមេដាយមាស ២ គ្រឿងជូនជាតិ នៅព្រឹត្តិការណ៍បាល់ទះប្រចាំទ្វីបអឺរ៉ុប ឆ្នាំ ២០១១ និង ២០១៩។ ជាមួយវត្តមាននៅក្លឹបចុងក្រោយ Skra Belchatow គេរកបាន ៩២០ ០០០ ដុល្លារ/រដូវកាល។
៨) Dmitry Muserskiy (ឌីមីទ្រី មូសឺរេស្គី) – សព្វថ្ងៃកំពុងបម្រើអាជីពឲ្យក្លឹប Suntory Sunbirds របស់ជប៉ុន ដែលធ្លាប់ឈ្នះមេដាយប្រាក់ និងមាស នៅការប្រកួតកម្រិតក្លឹបប្រចាំទ្វីបអាស៊ី។ ចង់ដើរតួជាដៃស្មាត់ក៏បាន រនាំងបាំងក៏ទៅរួច ជាមួយកម្ពស់អំណោយទានពីធម្មជាតិ ២,១៨ ម៉ែត្រ។ ក្នុងមួយរដូវកាល កីឡាកររុស្ស៊ីទទួលបានប្រាក់ ៩៥០ ០០០ ដុល្លារ។
៧) Robertlandy Simon (រ៉ូបឺតឡេនឌី ស៊ីមុន) – បាំងយក្សរបស់គុយបា រាប់ជា Top 1 កីឡាករស៊ីថ្លៃខ្ពស់ដាច់គេ បើគិតតួលេខក្រោមប្រាក់ឈ្នួល ១ លាន ត្រង់គេអាចរកបាន ៩៦៧ ០០០ ដុល្លារ/រដូវកាលពីក្លឹប Gas Sales Bluenergy Piacenze នៅឯអ៊ីតាលី។
៦) Logan Tom (ឡូហ្គេន ថម) – ជាអតីតកីឡាការនីតំណាងឲ្យជម្រើសជាតិសហរដ្ឋអាមេរិក និងប្រលូកក្នុងអាជីពលើកចុងក្រោយត្រឹមឆ្នាំ ២០១៩ កាលនៅក្លឹបអ៊ីស្រាអែល Maccabi XT Haifa ដោយគ្រានោះលេងជាដៃស្មាត់ ទទួលបានប្រាក់ ១ លានដុល្លារ/រដូវកាល។
៥) Bartosz Kurek (បាតូស គូរេក) – ស្មាត់ស្តាំរបស់ប៉ូឡូញឯណេះវិញ ដែលទើបតែឈ្នះមេដាយមាសនៅព្រឹត្តិការណ៍ FIVB Nations League ជាមួយជម្រើសជាតិ រួចបើនិយាយអំពីការលេងឲ្យក្លឹបនៅជប៉ុន Wolfdogs Nagoya មួយរដូវកាល ទទួលបាន ១,១ លានដុល្លារ។
៤) Earvin N’Gapeth (អ៊ែវិន អិនហ្គាពេ)– ជាកីឡាករដុះស្នឹមរបស់ជម្រើសជាតិបាល់ទះបារាំង មានវត្តមានតាំងឆ្នាំ ២០១០ មកទល់សព្វថ្ងៃ។ ជាមួយកេរ្តិ៍ឈ្មោះកាន់មេដាយមាស ៥ គ្រឿង ពេលចុងក្រោយនាំឲ្យគេទទួលបានឱកាសជាតួឯកនៅក្លឹបតួកគី Halkbank Ankara រកបានមួយរដូវកាល ១,៣៥ លានដុល្លារ។
៣) Katerina Gamova (កាតឺរីណា ហ្គាម៉ូវ៉ា) – នេះជាកីឡាការនីមួយក្នុងចំណោម ៣ រូប មានឈ្មោះក្នុងបញ្ជី តែបានចូលនិវត្តច្រើនឆ្នាំហើយពីជម្រើសជាតិ និងក្លឹបបាល់ទះនៅឯប្រទេសរុស្ស៊ី។ ខណៈកាលនៅបម្រើអាជីព ម្ចាស់មេដាយមាស ៨ គ្រឿងរូបនេះ រកបាន ១,៤ លានដុល្លារ/រដូវកាល។
២) Wilfredo Leon (វីលហ្រ្វេដូ ឡេអុន) – បងប្អូនខ្លះប្រហែលជាស្គាល់ នេះជាអ្នកវ៉ៃសេវាល្បឿនលឿនបំផុតកត់ត្រាដោយសហព័ន្ធបាល់ទះអន្តរជាតិ FIVB។ កន្លងទៅថ្មីថ្មោងក៏ទើបតែឈ្នះមេដាយមាសជាមួយជម្រើសជាតិប៉ូឡូញ នៅ Nations League ២០២៣ ផងដែរ។ គេជាអត្តពលិកបាល់ទះផ្នែកបុរស កើបបានប្រាក់ចំណូលខ្ពស់បំផុតក្នុងលោក ដោយជាមួយក្លឹបអ៊ីតាលី Sir Safety Susa Vim Perugia រកបានមួយរដូវកាល ១,៤ លានដុល្លារ។
១) Zhu Ting (ហ្សូ ទីង)– បើតាមសារព័ត៌មាន South China Morning Post ចុះផ្សាយ នេះគឺជាអត្តពលិកកើបចំណូលខ្ពស់ដាច់គេក្នុងពិភពបាល់ទះ បន្ទាប់ការចុះកុងត្រាចូលរួមជាមួយក្លឹប VakifBank របស់តួកគីចន្លោះឆ្នាំ ២០១៦ ដល់ ២០១៩។ កាលនោះមួយរដូវកាល កីឡាការនីសញ្ជាតិចិន កើបលុយចូលហោប៉ៅ ១,៦០ លានដុល្លារ ក្នុងតំណែងជាដៃស្មាត់ Outside Hitter៕
ប្រភព៖ បរទេស