បើនិយាយអំពីវិស័យកីឡាសម្រាប់នារីៗ នៅក្នុងប្រទេសទួរគី គឺគេចាប់អារម្មណ៍លើផ្នែកបាល់ទះ ខ្លាំងជាងបាល់ទាត់ ហើយបង្វែរទៅមើលចំណាត់ថ្នាក់ Ranking លំដាប់ពិភពលោក ក៏ក្រុមជម្រើសជាតិមួយនេះ ឈរលេខរៀងទី ១ នាំមុខទាំងលើសហរដ្ឋអាមេរិក អ៊ីតាលី និងប្រេស៊ីលជាដើម។
ជ្រៀតទៅធនធានកីឡាការនីនៅទីនោះ ក្រៅតែពីកាយសម្បទា ទេពកោសល្យអំណោយទាន ទៀតសោតបង្វែរទៅមើលសម្រស់ ក៏រមែងឆក់យកបេះដូងបុរសៗអ្នកគាំទ្រមិនចេះតិចនាក់ផងដែរ ជាពិសេសគឺត្រកូលគ្រួសារ Gunes (ហ្គូណេស) ដែលបងប្អូនស្រីបង្កើតទាំង ៣ សព្វថ្ងៃសុទ្ធសឹងជាកីឡាការនីរួមអាជីពបាល់ទះតែមួយ។ CTS SPORTS បង្ហាញឲ្យស្គាល់នូវរឿងរ៉ាវសំខាន់ៗអំពីពួកនាង៖
៣) កូនស្រីច្បង Zehra Gunes (ហ្សេរ៉ា ហ្គូណេស)
បងប្អូនអ្នកស្នេហាកីឡាបាល់ទះអន្តរជាតិ ប្រហែលជាធ្លាប់បានឃើញនូវរូបភាពចែកចាយជាច្រើនសន្លឹកចេញពីរាជិនីបាល់ទះទួរគី វ័យ ២៤ ឆ្នាំ សព្វថ្ងៃក៏ជាសមាជិកមួយក្នុងជម្រើសជាតិផ្នែកនារី ទើបតែវាយបានមេដាយមាសថ្មីថ្មោងនៅព្រឹត្តិការណ៍ FIVB Nations League ២០២៣។
នាងជាកូនស្រីច្បងក្នុងត្រកូលគ្រួសារ Gunes មានកម្ពស់ ១,៩៧ ម៉ែត្រ ទម្ងន់ ៨៤ គីឡូក្រាម លេងតំណែងជាអ្នកលោតបាំង (Middle Blocker) ជាប់រហស្សនាមជារនាំងយក្សកំពូលសម្រស់។ សមិទ្ធផលសម្រេចជូនជាតិ ធ្លាប់កាន់មេដាយសំរឹទ្ធ ២ គ្រឿង ប្រាក់ ២ គ្រឿង និងមាស ២ គ្រឿង ហើយជាមួយក្លឹបកំពុងបម្រើអាជីពនៅក្លឹប Vakifbank Istanbul សរុបទាំងពីរលើកចូលជាង ១០ ឆ្នាំមកហើយ។
ហែលកាត់ក្នុងអាជីពតាំងពីនៅក្មេងវ័យ ក្រៅតែពីគុណភាពក្នុងតារាងបាល់ទះ ជាញឹកញយ Zehra ក៏ចាយសម្រស់បង្ហោះរូបភាពស្រស់សោភាជាច្រើនសន្លឹកលើបណ្តាញសង្គម នាំឲ្យមានអ្នកតាម Followers ដល់ ៣ លាននាក់លើ Instagram។
២) កូនស្រីកណ្តាល Irem Nur Gunes (អ៊ីរឹម នួរ ហ្គូណេស)
បើមិនប្រាប់ប្រហែលគ្នាយើងភាគច្រើនមិនដឹងនោះទេ ថា Zehra ក៏មានបងប្អូនស្រីពីររូបផ្សេងទៀត ហើយទាំងសម្រស់ ទាំងទេពកោសល្យក៏រត់លើគន្លងតែមួយ។ នេះចូលមកដល់កូនកណ្តាល មានអាយុ ១៩ ឆ្នាំ លេងតំណែងជាស្មាត់ Opposite Hitter ឲ្យក្លឹបបាល់ទះ Edremit Bld. Altinoluk នៅក្របខ័ណ្ឌលំដាប់កំពូលប្រចាំផ្ទៃប្រទេសដូចគ្នា តែកីឡាការនីកម្ពស់ ១,៨៨ ម៉ែត្ររូបនេះ មិនទាន់មានឈ្មោះជាប់ជម្រើសជាតិនៅឡើយ។
ទោះយ៉ាងណា Irem មិនទាន់ជាល្បីល្បាញខ្លាំងដូចបងស្រីរបស់នាង ត្រង់ការគាំទ្រលើ Instagram ទើបមានតែជិត ៤ មុឺន Followers។
១) កូនស្រីពៅ Mina Gunes (មីណា ហ្គូណេស)
កើតនៅខែមិថុនា ឆ្នាំ ២០០៦ គិតមកទល់សព្វថ្ងៃ មានអាយុទើបតែ ១៧ ឆ្នាំប៉ុណ្ណោះ ដល់តែមើលមុខមាត់រូបសម្រស់ជារួម បានដឹងថា បងប្អូនស្រីបង្កើតទាំង ៣ ប្រៀបដូចជាកូនភ្លោះអ៊ីចឹង។ មានកម្ពស់ ១,៨៨ ម៉ែត្រ ទម្ងន់ ៧៤ គីឡូក្រាម ជាស្មាត់ឆ្វេង នៅតំណែង Opposite Hitter ឲ្យក្លឹបឈុតតូច Vakifbank II ទ្រនំតែមួយ ដូចទៅនឹងបងស្រីរបស់នាង Zehra ដែរ។
ដូច្នេះបើបន្តអភិវឌ្ឍគុណភាពកាន់តែល្អ តទៅមុខថាមិនត្រូវត្រកូល Gunes ទាំង ៣ នឹងរំលេចក្នុងឈុតជម្រើសជាតិតែមួយក៏អាចទៅរួច មានស្មាត់ចាំគប់ មានរនាំងចាំបាំង ពេញលេញល្អណាស់៕
ប្រភព៖ បរទេស
