ក្រុមជម្រើសជាតិបាល់ទះកម្ពុជា នឹងត្រូវមានប្រកួតមិត្តភាពយ៉ាងតិច៣ទៀតនាពេលខាងមុខនេះ ដើម្បីជាការត្រៀមខ្លួនឱ្យបានល្អបំផុតសម្រាប់ស៊ីហ្គេម២០២៣ខាងមុខ។
កម្ពុជាពិតជាធ្វើបានល្អមែនទែនក្នុងការប្រកួតមិត្តភាពទល់ក្រុមជម្រើសជាតិអាយុក្រោម១៩ឆ្នាំរបស់បារាំងកាលពីពេលកន្លងទៅនេះ។ យ៉ាងណាមិញ ក្រោយពីចប់ការប្រកួតនេះហើយ ក្រុមកម្ពុជាក៏នឹងមានគម្រោងសម្រាប់ប្រកួតមិត្តភាពដទៃទៀតផងដែរ។ បើតាមការបញ្ជាក់របស់លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធបាល់ទះកម្ពុជាបានបង្ហើបប្រាប់អ្នកកាសែតកាលពីពេលកន្លងទៅនេះ។
លោក បាននិយាយថាកម្ពុជាកំពុងព្រៀងលិខិតដើម្បីស្នើសុំប្រកួតមិត្តភាពជាមួយក្លឹបនៅប្រទេសចិននៅខែមីនាខាងមុខនេះ។ ខណៈដែលការប្រកួតមិត្តភាពអន្ដរជាតិ២ប្រកួតទៀតនៅក្រៅប្រទេសមាននៅម៉ាឡេស៊ី និងសិង្ហបុរី។ ដោយក្រុមការងារកំពុងរៀបចំកាលវិភាគប្រកួតឱ្យបានល្អបំផុត ដើម្បីជាការត្រៀមខ្លួនឱ្យល្អសម្រាប់ព្រឹត្តិការណ៍ស៊ីហ្គេម២០២៣ដែលកម្ពុជាធ្វើជាម្ចាស់ផ្ទះ៕