អ្នកដែលធ្លាប់លំបាក ទើបយល់ច្បាស់ពីទុក្ខរបស់អ្នកអត់ដូចគ្នា ហើយមួយក្នុងចំណោមនោះក៏មានខ្សែប្រយុទ្ធស្លាប Wilfried Zaha មួយរូបផងដែរ។ កីឡាករសញ្ជាតិកូឌីវ័រ ត្រូវបានគេស្គាល់នៅពេលបង្ហាញទម្រង់លេងល្អឲ្យក្លឹប Crystal Palace ហើយកាន់តែពិសេស បន្ទាប់ការផ្លាស់មកក្លឹបយក្ស Manchester United ដ្បិតមិនទទួលបានជោគជ័យ។
លើសតែពីគុណភាពលើទីលានប្រកួត រូតចេញមកជីវិតនៅខាងក្រៅ បុរសវ័យ ៣០ ឆ្នាំ ក៏រាប់ជាកំពូលកីឡាករចិត្តធម៌ប្រចាំប្រទេសកូឌីវ័រ ឥតខុសពី Sadio Mane តំណាងឲ្យជាតិសាសន៍សេណេហ្គាល់។ CTS Sports ច្បិចលើកមកបង្ហាញនូវសកម្មភាពដ៏គួរឲ្យគោរព ៣ លើករបស់ Zaha៖
៣) បរិច្ចាគប្រាក់ពលកម្មជាប្រចាំ ១០ ភាគរយ
តាំងពីរកបានជាង ៣០ ០០០ ផោន កើនមកដល់ជាង ១៣០ ០០០ ផោន/សប្តាហ៍ Zaha នៅតែប្រកាន់ខ្ជាប់ទម្លាប់ចូលរួមក្នុងការសប្បុរសធម៌ជាប្រចាំ បន្ទាប់តែពីសម្រេចគោលដៅជួយដល់ឪពុកម្តាយនៅឯស្រុកកំណើត។
ប្រាក់ខែរកបានដំបូងៗ កីឡាករជើងស្តាំ ខំត្បិតត្បៀតរៀបមកសង់ផ្ទះបានមួយខ្នងជូនលោកពុកអ្នកម៉ែនៅឯប្រទេសកំណើតកូឌីវ័រ ហើយសកម្មបន្តបន្ទាប់ទៀត បានដាក់កំហិតលើខ្លួនឯង ដោយរៀងរាល់ខែ តែងបរិច្ចាគប្រាក់ខែ ១០ ភាគរយស្មើនឹងជាង ៦ មុឺនដុល្លារទៅក្នុងការងារសប្បុរសធម៌។
លោកបានបញ្ជាក់ថា៖ “ការធ្វើសកម្មភាពសប្បុរសធម៌អស់នេះ មិនត្រឹមតែក្នុងទឹកដីអង់គ្លេសទេ តែក៏ធ្វើព្រមគ្នានៅកូឌីវ័រផងដែរ ហើយម្តាយរបស់ខ្ញុំ គាត់សប្បាយចិត្តណាស់ គាត់បន់ឲ្យតែដល់ចុងខែដើម្បីយកលុយអស់នោះទៅសាងអំពើល្អ”។
២) ដកលុយពីហោប៉ៅ ជួយក្លឹបបាល់ទាត់ផ្នែកនារី
Zaha បានចាប់ផ្តើមអាជីពជាកីឡាករបាល់ទាត់ ជាមួយ Crystal Palace តាំងតែពីនៅឈុតតូច មុនឆ្នាំ ២០១០ ល្មមអាចរាប់ថា Palace ជាផ្ទះទីពីររបស់គេទៅហើយ។ ដល់ពេលមួយឈុតថ្នាលផ្នែកនារីរបស់ក្លឹប បានជួបបញ្ហាហិរញ្ញវត្ថុ ហើយបើគ្មានការទ្រទ្រង់ពីជំនួយខាងក្រៅ នោះក្លឹបនឹងត្រូវរំសាយមិនអាចបន្តទៅមុខឡើយ។
វាជួនពេលដែល Zaha ទើបតែចុះហត្ថលេខាទទួលបានប្រាក់ឈ្នួលលើកុងត្រា ១៣០ ០០០ ផោន/សប្តាហ៍ថ្មីថ្មោង ហើយភ្លាមៗគេក៏មិនស្ទាក់ស្ទើរនោះដែរ បន្ទាប់តែលឺដំណឹងក៏ប្រញាប់ដកលុយពីហោប៉ៅទៅជួយក្លឹបដែលកំពុងខ្វះខាត ជាចំណែកឈុតតូចផ្នែកនារី អាចបន្តដំណើរមកទល់សព្វថ្ងៃ។
១) ជួយក្មេងៗដែលក្រលំបាក
អតីតសមាជិក Man Utd បានកើតក្នុងទ្រនំគ្រួសារក្រលំបាក ហើយជាកូនទី ៥ ក្នុងចំណោមបងប្អូនទាំង ៩ នាក់ រួចកាលនៅកុមារភាព ម្តាយឪពុកបានព្យាយាមណាស់ដើម្បីរិះរកគ្រប់វិធីជួយឲ្យកូនបានទៅហ្វឹកហាត់ ទម្រាំបានក្លាយជាកីឡាករអាជីពទល់សព្វថ្ងៃ។
នៅអាយុ ៦ ឆ្នាំ ពេលផ្លាស់មកចក្រភពអង់គ្លេស គ្រួសាររបស់គេពុំមានជម្រកស្នាក់អាស្រ័យនោះទេ ហើយវាជាពេលវេលាដ៏កម្សត់កម្រ តែដោយសារឆន្ទៈនិងការលះបង់របស់លោកអ្នកមានគុណទាំងពីរ ក៏ជំរុញលើកទឹកចិត្តកូន ឲ្យបន្តដំណើរជីវិត ដ្បិតថ្ងៃខ្លះគ្មានអាហារហូបចុក គ្មានកន្លែងរស់នៅស្រួលក៏ដោយ។
មកទល់បច្ចុប្បន្ន ជាពេលវេលាដែល Zaha អាចរស់រានក្នុងជីវភាពមានបាន គេក៏មានចិត្តអាណិតដល់ក្មេងៗដែលមានឆន្ទៈស្រលាញ់បាល់ទាត់ រួចបានចាយលុយបង្កើតក្លឹបបាល់ទាត់ Wilfried Zaha Academy នៅប្រទេសកំណើត ដើម្បីឲ្យក្មេងៗទាំងនោះទទួលបានការហ្វឹកហាត់ឥតគិតថ្លៃ ហើយបើមានសមត្ថភាព គេក៏នឹងព្យាយាមជំរុញឲ្យមកបានក្លាយជាកីឡាករអាជីពនៅក្លឹបធំៗទៀតផង។
ដូចគ្នានឹងទំនុកបម្រុងលើការរៀនសូត្រ Zaha បានឲ្យបងស្រីរបស់គេ រៀបចំមជ្ឈមណ្ឌលជួយដល់ក្មេងៗឲ្យទទួលបានការសិក្សាឥតបង់ប្រាក់ ហើយថែមទាំងជួយផ្គត់ផ្គង់សម្ភារៈនានា រួចមកទល់ពេលចុងក្រោយលឺថាបានផ្គត់ផ្គង់កុមារដល់ទៅជាង ៤០ នាក់ឯណោះ៕
ប្រភព៖ បរទេស