លោក Keisuke Honda សុំទោសអ្នកគាំទ្រកម្ពុជាចំពោះលទ្ធផលមិនអាចឡើងទៅវគ្គពាក់កណ្ដាលផ្ដាច់ព្រ័ត្រពានរង្វាន់ AFF Cup 2022 បាន ប៉ុន្តែលោកក៏មានមោទកភាពចំពោះកូនក្រុមផងដែរ។
ក្រុមជម្រើសជាតិកម្ពុជាបានបញ្ចប់ការប្រកួត AFF Cup 2022 ហើយនៅយប់មិញនេះ ក្រោយពីចាញ់ក្រុមថៃ ៣-១ ឈរនៅចំណាត់ថ្នាក់លេខ៣ក្នុងពូល។ ជាមួយចំណាត់ថា្នក់នេះ ក្រុមកម្ពុជាមិនមានឱកាសដើម្បីឡើងទៅវគ្គបន្ដឡើយ ព្រោះក្នុងពូលគេយកតែលេខ១និងលេខ២ប៉ុណ្ណោះ។ ត្បិតតែមិនអាចសម្រេចតាមគោលដៅមែន ប៉ុន្តែកម្ពុជានៅឆ្នាំនេះទទួលបានលទ្ធផលល្អច្រើន ជាពិសេសរកបានពិន្ទុច្រើនបំផុតហើយបើធៀបជាមួយការប្រកួតកន្លងៗមក។
លោក Keisuke Honda អ្នកចាត់ការក្រុមជម្រើសជាតិកម្ពុជាបាននិយាយក្រោយចប់ការប្រកួតថា៖ “សូមអភ័យទោសចំពោះលទ្ធផល ប៉ុន្តែខ្ញុំមានមោទកភាពចំពោះកីឡាកររបស់យើង ហើយសូមអរគុណអ្នកទាំងអស់គ្នាសម្រាប់រឿងរ៉ាវគ្រប់យ៉ាង”៕