ក្រុមបាល់ទាត់ជម្រើសជាតិកម្ពុជា បានធ្វើដំណើរទៅកាន់ប្រទេសថៃហើយនៅព្រឹកមិញនេះ ដើម្បីត្រៀមខ្លួនប្រកួតចុងក្រោយក្នុងពូលជាមួយក្រុមថៃ ពានរង្វាន់ AFF Mitsubishi Electric Cup 2022 ។
កម្ពុជាធ្វើបានល្អសម្រាប់ការប្រកួតទល់ក្រុមព្រុយណេកាលពីយប់មិញនេះ ដោយយកឈ្នះលើក្រុមព្រុយណេបានដល់ទៅ៥-១ ឯណោះ។ ជាមួយជ័យជម្នះនេះដែរ កម្ពុជាមាន៦ពិន្ទុក្នុងដៃហើយឆ្លងកាត់៣ប្រកួតមកនេះ ដោយឈ្នះក្រុមហ្វីលីពីន និងព្រុយណេ តែចាញ់ឥណ្ឌូណេស៊ី។ ខណៈដែលប្រកួតចុងក្រោយរបស់កម្ពុជានឹងត្រូវប៉ះក្រុមខ្លាំងថៃនៅថ្ងៃទី២ខែមករាឆ្នាំ២០២៣ខាងមុខនៅទឹកដីថៃ។
ដោយសារតែជំនួបជាមួយក្រុមថៃ ជាជំនួបសំខាន់បំផុតនិងទាមទារឈ្នះដាច់ខាតផងនោះ ទើបបានជាក្រុមកម្ពុជាត្រូវត្រៀមខ្លួនឱ្យបានល្អបំផុត។ ពួកគេបានចាកចេញពីកម្ពុជានៅព្រឹកមិញនេះ ដើម្បីទៅត្រៀមខ្លួនឱ្យបានល្អសម្រាប់ការប្រកួត។ ដោយជំនួបនេះកម្ពុជា ទាមទារជ័យជម្នះដាច់ខាតហើយលើក្រុមថៃ ទើបមានឱកាសឡើងទៅវគ្គពាក់កណ្ដាលផ្ដាច់ព្រ័ត្រ៕