លោក Keisuke Honda អ្នកចាត់ការក្រុមជម្រើសជាតិកម្ពុជា បានអះអាងថាប្រកួតបន្ទាប់ដែលនឹងត្រូវប៉ះក្រុមម្ចាស់ផ្ទះឥណ្ឌូណេស៊ីគឺជាការប្រកួតដែលមានសារៈសំខាន់បំផុត ហើយតឹងតែងបំផុតសម្រាប់កម្ពុជាផងដែរក្នុងពានរង្វាន់ AFF Cup 2022 នេះ។
នៅយប់មិញនេះ ក្រុមគោរព្រៃកម្ពុជាបានយកឈ្នះលើក្រុមហ្វីលីពីនក្នុងលទ្ធផល ៣-២ ក្នុងកីឡដ្ឋានមរតកតេជោ។ ការឈ្នះប្រកួតបើកឆាកនេះពិតជាសំខាន់មែនទែនហើយសម្រាប់កម្ពុជា ព្រោះបាន៣ពិន្ទុប្រកួតដំបូង ហើយប្រកួតបន្ទាប់បើអាចយកឈ្នះបានទៀត នោះឱកាសឡើងទៅវគ្គពាក់កណ្ដាលផ្ដាច់ព្រ័ត្រពិតជាមានច្រើនមិនខាន។ ស្របពេលក្នុងការប្រកួតនេះទៀតសោត គោលដៅធំសម្រាប់កម្ពុជាគឺការឡើងទៅវគ្គបន្ដនេះហើយ។
ក្រោយពីចប់ការប្រកួតទៅ លោក Keisuke Honda អ្នកចាត់ការក្រុមកម្ពុជាបានបង្ហាញចំណាប់អារម្មណ៍ដែរថា៖ “អរគុណសម្រាប់ការគាំទ្រនៅរាត្រីនេះទល់ក្រុមហ្វីលីពីន។ ការប្រកួតបន្ទាប់គឺជាការប្រកួតសំខាន់បំផុតហើយវានឹងតឹងតែងបំផុតផងដែរទល់ក្រុមឥណ្ឌូណេស៊ី។ យើងនឹងរៀបចំក្រុមឱ្យបានល្អសម្រាប់ជំនួបមួយនេះ”។
ការប្រកួតពានរង្វាន់ AFF Mitsubishi Electric Cup 2022 ដែលត្រូវធ្វើចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២៣ ដោយក្នុងនោះ ក្រុមកម្ពុជា ឈរនៅពូលA ជាមួយថៃ ឥណ្ឌូនេស៊ី ហ្វីលីពីន និងក្រុមប្រ៊ុយណេ ចំណែកពូលB មានក្រុមវៀតណាម ម៉ាឡេស៊ី សិង្ហបុរី មីយ៉ាន់ម៉ា និងឡាវ៕