លោក Ryu Hirose គ្រូបង្វឹកក្រុមជម្រើសជាតិកម្ពុជា បានអះអាងថាក្នុងការប្រកួតខាងមុខនេះលោក Keisuke Honda នឹងមានវត្តមានមកដឹកនាំក្រុមជម្រើសជាតិមិនខាន។
ក្រុមគោព្រៃកម្ពុជានឹងធ្វើការប្រកួត AFF Mitsubishi Electric Cup បើកឆាកប្រកួតដំបូងទល់នឹងក្រុមជម្រើសជាតិហ្វីលីពីននៅថ្ងៃស្អែកនេះហើយ វេលាម៉ោង៥ល្ងាចតទៅ។ ជំនួបបើកឆាកក្នុងពូលនេះដែរ កម្ពុជាបានសម្ងំហ្វឹកហាត់ជាច្រើនថ្ងៃមកហើយ និងបានត្រៀមខ្លួនជាស្រេចដូចគ្នាដើម្បីស្វែងរកឱកាសទទួលបាន៣ពិន្ទុក្នុងការប្រកួតដំបូងនេះ។ ខណៈដែលគោលដៅធំសម្រាប់កម្ពុជាក្នុងការប្រកួតពានរង្វាន់កម្រិតតំបន់នេះ គឺធ្វើយ៉ាងណាឆ្លងឱ្យផុតវគ្គចែកពូល។
ជាមួយការតាំងចិត្តនេះដែរ លោក Hirose គ្រូបង្វឹកក្រុមឈុតធំកម្ពុជាបានអះអាងប្រាប់អ្នកគាំទ្រថានៅជំនួបនាថ្ងៃស្អែកនេះ នឹងមានវត្ដមានរបស់លោក Honda អ្នកចាត់ការក្រុមមកផងដែរ។ កន្លងទៅ Honda មិនបានមកផ្ទាល់នោះទេដោយសារមានភារកិច្ចនៅ World Cup តែក្រោយពីចប់នៅយប់មិញ លោកអាចត្រលប់មកជួយដឹកនាំក្រុមជម្រើសជាតិកម្ពុជាវិញហើយ។
រំលឹកថាការប្រកួតពានរង្វាន់ AFF Mitsubishi Electric Cup 2022 ដែលត្រូវធ្វើចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២៣ ដោយក្នុងនោះ ក្រុមកម្ពុជា ឈរនៅពូលA ជាមួយថៃ ឥណ្ឌូនេស៊ី ហ្វីលីពីន និងក្រុមប្រ៊ុយណេ ចំណែកពូលB មានក្រុមវៀតណាម ម៉ាឡេស៊ី សិង្ហបុរី មីយ៉ាន់ម៉ា និងឡាវ៕