ខ្សែការពារ ឈិន ឈឿន បានសម្រេចចិត្តចូលនិវត្តន៍ពីវិស័យបាល់ទាត់ហើយ ដើម្បីមានឱកាសចេញប្រកបរបររកស៊ីដោយខ្លួនឯងវិញ។
ក្លឹបក្រសួងការពារជាតិ Tiffy Army FC បានចេញសេចក្ដីប្រកាសថា៖ “កីឡាករ ឈិន ឈឿន បន្ទាប់ពីសម្រេចចិត្តចូលនិវត្តន៍ ពីអាជីពជាកីឡាករបាល់ទាត់ នៅថ្ងៃទី១២ ខែធ្នូ ឆ្នាំ២០២២នេះ ដើម្បីប្រកបមុខរបរផ្ទាល់ខ្លួន។ ឈិន ឈឿន បានរួមរស់ និងជួយយើងអស់រយៈពេល ប្រមាណជាង១៣ ឆ្នាំមកហើយ ព្រមទាំងបង្កើតបានស្នាដៃជាច្រើន ជាពិសេសចូលរួមជាមួយយើងក្នុងការលើកពានរង្វាន់ Hun Sen Cup កាលពីរដូវកាលមុនៗ ជាច្រើនលើក ។ តាំងនាមថ្នាក់ដឹកនាំ មន្ត្រី គ្រូបង្វឹក កីឡាករទាំងអស់ ពិតជាចង់ចាំមិនភ្លេចនូវស្នាដៃ ក៍ដូចជាអនុស្សាវរីយ៍ ជាច្រើនកន្លងមក និងសូមជូនពរ ដល់ ឈិន ឈឿន ព្រមទាំងក្រុមគ្រួសារ ទទួលបាននូវភាពជោគជ័យលើអាជីវកម្មមុខរបរថ្មីនេះ”។
សាមីខ្លួនកីឡាករ ក៏បានបង្ហោះសារលាអ្នកគាំទ្រនិងអរគុណចំពោះរឿងកន្លងមកដូចគ្នា៖“អនុស្សាវរីយ៍ ជាច្រើនរាប់មិនអស់ដែលដិតដាមក្នុងខួរក្បាលរបស់ខ្ញុំ។ ខ្ញុំក៏សូមអរគុណយ៉ាងជ្រាលជ្រៅសម្រាប់ពុកម៉ែបងប្អូនក្មួយៗទាំងអស់ដែលតែងតែស្រឡាញ់គាំទ្រខ្ញុំកន្លងមក។ ភាពជោគជ័យដ៏ធំនៅក្នុងអាជីពបាល់ទាត់របស់ខ្ញុំក៏មានចំណែករបស់ពុកម៉ែបងប្អូនក្មួយៗ ដែលស្រលាញ់គាំទ្រលើកទឹកចិត្ត”៕