ក្រុមហ៊ុន ខេមបូឌានព្រីមៀរលីគ បានអញ្ជើញ លោកអគ្គលេខាធិការ ក្លិបបាល់ទាត់ខេត្តព្រៃវែង, ថ្នាក់ដឹកនាំ, លោកគ្រូបង្គោល និង សាមីកីឡាករផ្ទាល់ជួប និងពន្យល់ ពីការធ្វេសប្រហែសដោយអចេតនា ក្នុងការផ្តល់ព័ត៌មាន ទៅដល់ក្លិប អំពីកីឡាករដែលទទួលបានពានកីឡាករល្អក្រោមអាយុ២២ឆ្នាំ សម្រាប់ការប្រកួតជម្រើសជើងឯកកម្ពុជាលីគ២ ឆ្នាំ២០២២ ដែលធ្វើឲ្យសាមីកីឡាករអវត្តមានក្នុងពិធីប្រគល់ពានរង្វាន់បាល់ទាត់ (CPL Football Award 2022) កាលពីថ្ងៃទី៧ ខែធ្នូ ឆ្នាំ២០២២កន្លងទៅ។
រំលឹកថាកីឡាករ ស៊ិន សុវណ្ណមករា របស់ (ក្លិបបាល់ទាត់ ខេត្តព្រៃវែង) ជាអ្នកឈ្នះពានរង្វាន់កីឡាករល្អជាងអាយុក្រោម ២២ឆ្នាំ រដូវកាលនេះ នៃ ជម្រើសជើងឯកកម្ពុជាលីគ ២ ឆ្នាំ២០២២។ តែសាមីខ្លួនមិនបានដឹងឡើយ ហើយក៏មិនបានចូលរួមពិធីប្រគល់ពានកាលពីពេលកន្លងទៅផងដែរ រហូតដល់មានការរិះគន់ ហើយរូបគេក៏បានបង្ហោះនៅលើបណ្ដាញសង្គមថែមទៀត។ ក្រុមហ៊ុន ខេមបូឌានព្រីមៀរលីគ បានទទួលស្គាល់កំហុសអចេតនានេះ ហើយក៏បានអញ្ជើញគេមកជួបនិងពន្យល់ឱ្យបានក្បោះក្បាយផងដែរ។
រំលឹកថាកម្មវិធីប្រគល់ពានដល់កីឡាករឆ្នើមៗរបស់កម្ពុជា CPL Football Award 2022 កាលពីថ្ងៃទី៧ ខែធ្នូ ឆ្នាំ២០២២កន្លងទៅ មានការចូលរួមជាច្រើនពីសំណាក់ថ្នាក់ដឹកនាំនិងកីឡាករដែលឈ្នះពាន។ នេះជាកម្មវីធីដំបូងរបស់កម្ពុជាដែលធ្វើឡើងដោយក្រុម ខេមបូឌានព្រីមៀរលីគ៕