ក្រុមបាល់ទាត់ជម្រើសជាតិកម្ពុជា នឹងត្រូវប្រកួតមិត្តភាពទល់ក្រុមជម្រើសជាតិម៉ាឡេស៊ីនៅម៉ោង៨យប់នេះហើយ ក្នុងការប្រកួតកម្ដៅសាច់ដុំត្រៀមចូលលេងពានរង្វាន់ AFF Mitsubishi Electric Cup 2022 ។
មុនការប្រកួតខាងលើចាប់ផ្ដើម លោក Hirose Ryu គ្រូបង្វឹកក្រុមជម្រើសជាតិកម្ពុជាបាននិយាយថា៖ «យើងទើបតែបញ្ចប់ការប្រកួតលីគកំពូល កាលពីថ្ងៃសៅរ៍ សប្តាហ៍មុន បន្ទាប់មកពួកយើងចាប់ផ្តើមប្រមូលផ្តុំនៅកម្ពុជា មុនពេលមកទីនេះ។ វាពិតជាមានរយៈពេលខ្លីសម្រាប់ពួកយើង ប៉ុន្តែយើងរៀបចំបានយ៉ាងល្អដើម្បីធ្វើឱ្យប្រាកដថា យុទ្ធសាស្ត្រ និងបច្ចេកទេសចម្បងរបស់យើងអាចឆ្ពោះទៅមុខដោយរលូន។ សម្រាប់ការប្រកួតដ៏សំខាន់លើកនេះពួកយើងចង់ធ្វើឱ្យបានលទ្ធផលល្អ និងទទួលបានជ័យជម្នះ ហើយការប្រកួតនេះ ក៏ជាផ្នែកមួយនៃការរៀបចំសម្រាប់ការប្រកួតនៅ AFF Mitsubishi Electric Cup នៅពេលខាងមុខ ដូច្នេះយើងនឹងខំប្រកួតឱ្យបានល្អបំផុត»។
រំលឹកថាការប្រកួតពានរង្វាន់ AFF Mitsubishi Electric Cup 2022 ដែលត្រូវធ្វើចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២៣ ដោយក្នុងនោះ ក្រុមកម្ពុជា ឈរនៅពូលA ជាមួយថៃ ឥណ្ឌូនេស៊ី ហ្វីលីពីន និងក្រុមប្រ៊ុយណេ ចំណែកពូលB មានក្រុមវៀតណាម ម៉ាឡេស៊ី សិង្ហបុរី មីយ៉ាន់ម៉ា និងឡាវ៕