កាលពីពេលថ្មីៗកន្លងទៅនេះ ខាងមន្ត្រីរបស់សហព័ន្ធបាល់ទាត់ទ្វីបអាស៊ី AFC បានចុះត្រួតពិនិត្យផ្ទាល់នៅកីឡដ្ឋានរបស់កម្ពុជា ក្នុងការត្រៀមរៀបចំការប្រកួតធំៗនាពេលខាងមុខនេះ។
សហព័ន្ធកីឡាបាល់ទាត់កម្ពុជា និងក្រុមហ៊ុនខេមបូឌានពីមៀរលីគ បានអញ្ជើញមន្ត្រីជំនាញមកពីសហព័ន្ធកីឡាបាល់ទាត់ទ្វីបអាស៊ី (AFC) ដើម្បីចុះត្រួតពិនិត្យ និងវាយតម្លៃកីឡដ្ឋានដែលអាចមានលក្ខណៈបច្ចេកទេសសម្រាប់រៀបចំការប្រកួតអន្តរជាតិផ្លូវការ និងត្រៀមរៀបចំការប្រកួតកីឡាស៊ីហ្គេម ឆ្នាំ២០២៣ ក៏ដូចជាបង្ហាញ និងជួយកែសម្រួលពីចំណុចខ្វះខាតដល់ក្លឹប ដើម្បីបំពេញបន្ថែមឱ្យបានកាន់តែល្អប្រសើរថែមទៀត។
ការត្រួតពិនិត្យកីឡដ្ឋាន ដោយលោក Abang Zulkarnain Bin Abang Abdurahman មកពីប្រទេសម៉ាឡេស៊ី (AFC)។ នៅល្ងាចថ្ងៃពុធ ទី២ ខែវិច្ឆិកា ឆ្នាំ២០២២ លោក. Abang Zulkarnain Bin Abang Abdurahman បានអញ្ជើញចុះធ្វើទស្សនកិច្ចនៅពុហកីឡដ្ឋាន មរតកតេជោ ជាមួយក្រុមការងាររបស់ ខេមបូឌានព្រីមៀរលីគ។ កីឡដ្ឋានជាតិមួយនេះ នឹងបម្រើដល់ការប្រកួតជាច្រើននៅពេលអនាគត៕