ក្លឹបបាល់ទាត់វិសាខា បានឡើងដល់វគ្គផ្ដាច់ព្រ័ត្រពានរង្វាន់សម្ដេចតេជោ ហ៊ុន សែន ហើយ បន្ទាប់ពីពួកគេបានយកឈ្នះលើក្រុមភ្នំពេញក្រោនក្នុងលទ្ធផល ៤-២ បើគិតទាំងពីរជើង។
ក្រោយពីចប់ការប្រកួតនេះទៅ លោកជំទាវ កែ សួនសុភី ប្រធានក្លឹបវិសាខាបានបង្ហាញចំណាប់អារម្មណ៍ថា៖ “វិសាខា! សូមចងចាំថា ផ្លូវទៅរកភាពជោគជ័យ គឺតែងតែមានពាក្យថា “យើង” មិនមែនមានតែ “ខ្ញុំ” ឡើយ។ មនុស្សតែម្នាក់មិនអាចសម្រេចគោលដៅអ្វីបានទេ។ វាតែងតែមានមនុស្សនៅជុំវិញខ្លួនយើងនៅចាំគាំទ្រយើង ហើយឆ្ពោះទៅមុខទាំងអស់គ្នា។ សូមអរគុណក្រុមគ្រួសារវិសាខា នៃការខិតខំប្រឹងប្រែងយកជ័យជម្នះថ្ងៃនេះ ហើយក៏សូមគោរពអរគុណអ្នកគាំទ្រទាំងសងខាង ដែលបានមកគាំទ្រក្រុមទាំងពីរ ។ វិសាខាត្រៀមខ្លួនទៅវគ្គផ្ដាច់ព្រ័ត្រ នាថ្ងៃទី០៦ ខែវិច្ឆិកា ឆ្នាំ២០២២ វេលាម៉ោង ៦៖៣០នាទីល្ងាច។ សូមកុំភ្លេចចូលរួមគាំទ្រទាំងអស់គ្នា”។
សូមបញ្ជាក់ថា វគ្គផ្តាច់ព្រ័ត្រពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ជាតិ ឆ្នាំ២០២២ ក្រុមវិសាខា នឹងត្រូវតតាំងជាមួយក្រុមបឹងកេត នៅថ្ងៃ៦ ខែវិច្ឆិកា ឆ្នាំ២០២២ នៅកីឡដ្ឋាន Smart RSN។ ដោយវិសាខានេះទៀតសោត ជាក្រុមដែលបានឡើងដល់វគ្គផ្ដាច់ព្រ័ត្រ៣ឆ្នាំជាប់គ្នាហើយគឺ២០២០ ២០២១ និង២០២២៕