ដ្បិតបើទីផ្សារដោះដូរ នៅសល់រយៈពេលជាង ១ ខែទៀតទើបបើកទ្វារដំណើរការ ក៏ប៉ុន្តែងាកមកកំពូលកីឡាករទាំង ៥ រូបនេះវិញ បានប្រកាសរួចរាល់ហើយ អំពីការចែកផ្លូវពីក្លឹបអាណាព្យាបាល ពោលសម្រេចនឹងក្លាយជា Free Agent ចាប់ពីថ្ងៃទី ១ កក្កដា ឆ្នាំ ២០២២ តទៅ។
ងាកមកអត្ថបទនេះ CTS Sports សូមធ្វើការបង្ហាញត្រួសៗ ជុំវិញអនាគតរបស់អ្នកទាំង ៥ បើផ្អែកតាមចចាមអារ៉ាមធ្លាប់បានចុះផ្សាយកន្លងមក៖
៥) Antonio Rudiger
ខ្សែការពារជាប់រហស្សនាម “ក្របីព្រៃអាល្លឺម៉ង់” បានប្រកាសហើយ ថានឹងមិនទម្លាក់ចុងប៊ិចចុះហត្ថលេខាលើកុងត្រាថ្មី ជាមួយ Chelsea តទៅទៀតឡើយ។ ចំពោះក្លឹបបន្ទាប់ ដែលនឹងអាចត្រងយក Rudiger ទំនងជាអធិរាជស Real Madrid ដោយលេចលឺថាហ៊ានផ្តល់ឲ្យនូវប្រាក់ពលកម្ម ៤០០ ០០០ អឺរ៉ូ/សប្តាហ៍ ឲ្យតែគេព្រមមកចុះចូល។
បញ្ជាក់ថា ខ្សែការពារវ័យ ២៩ ឆ្នាំ បានរួមជើងនៅ Chelsea រយៈពេល ៥ រដូវកាល តែស្គាល់រសជាតិលើកពានអឺរ៉ុប ទាំង UEFA Champions League និង Europa League ហើយពានក្នុងស្រុកមួយចំនួន លើកលែងតែ Premier League។
៤) Luis Suarez
ក្រោយចាយពេលជិត ២ ឆ្នាំនៅក្លឹប Atletico Madrid ទីបំផុត Luis Suarez ក៏ប្រកាសអំពីការចាកចេញ នៅក្រោយបញ្ចប់រដូវកាលខាងមុខ ខណៈទ្រនំបន្ទាប់ តាមការរំពឹងទុក អាចជាក្លឹប Aston Villa នៅឯលីគកំពូលអង់គ្លេស។
ខ្សែប្រយុទ្ធវ័យ ៣៥ ឆ្នាំ ទំនងជានឹងទៅចុះចូលជាមួយ Philippe Coutinho រួមនឹងការដឹកនាំរបស់មិត្តចាស់លោក Steven Gerrard នៅឯក្លឹបម្ចាស់ដី Villa Park។ ស្ថិតិរដូវកាលនេះ កីឡាករអ៊ុយរុយហ្គាយរកបាន ១៣ គ្រាប់ និង Assist ៣ លើក នៅការបង្ហាញខ្លួន ៤៤ ប្រកួត។
៣) Giorgio Chiellini
ចាយពេល ១៧ ឆ្នាំនៅក្លឹប Juventus ទីបំផុត ខ្សែការពារសញ្ជាតិអ៊ីតាលី Chiellini បានប្រកាសចាកចេញ នៅក្រោយថ្ងៃទី ៣០ មិថុនាខាងមុខ។ ស្ថិតនៅវ័យ ៣៧ ឆ្នាំទៅហើយ គេមិនទាន់ច្បាស់ថា ខ្ញីចាស់ខាងលើ នឹងបន្តអាជីព ឬប្រកាសចូលនិវត្តនោះទេ។
២) Gareth Bale
តាមរយៈការលើកឡើងរបស់ភ្នាក់ងារ លោក Jonathan Barnett សម្រាប់កីឡាករវែល នឹងមិនមានការបន្តកុងត្រាថ្មីអ្វីឡើយ ពោលនឹងកំណត់ផ្លាស់ទៅក្លឹបថ្មី នៅលក្ខខណ្ឌឥតតម្លៃផ្ទេរ ក្រោយថ្ងៃទី ៣០ មិថុនា។ អនាគតនៃការផ្លាស់ទៅក្លឹបថ្មីណាមួយ ប្រហែលជានឹងត្រូវសម្រេច ក្រោយការប្រកួតរបស់ក្រុមជម្រើសជាតិវែល នៅវគ្គជម្រុះបឋម FIFA World Cup 2022។
១) Paulo Dybala
ស្ថិតនៅវ័យទើបតែ ២៨ ឆ្នាំ គួបផ្សំនឹងគុណភាពដែលបន្តមាន Dybala ក៏សម្រេចចិត្ត ដើរចេញពី Juventus ហើយតាមចចាមអារ៉ាម ទំនងជានឹងផ្ទេរទៅក្លឹបនៅលីគកំពូលអង់គ្លេស អាចជា Arsenal ឬ Man Utd។ កីឡាករអាហ្សង់ទីន រដូវកាលនេះ រកបាន ១៥ គ្រាប់និង Assist ៦ លើកឲ្យក្លឹបសេះបង្កង់៕
ប្រភព៖ បរទេស