ក្រុមតោខៀវ Chelsea កំពុងចរចាខ្ចីជើងខ្សែការពារ Layvin Kurzawa ពីក្រុម PSG នាខែមករានេះ ដើម្បីមកពង្រឹងតំបន់ការពារឡើងវិញ ក្រោយមានបញ្ហារបួសកីឡាករច្រើនពេក។
Ben Chilwell មានបញ្ហារបួសដែលតម្រូវឱ្យរូបគេសម្រាករហូតដល់ចប់រដូវកាលនេះ។ ដោយសារតែកត្ដាបាត់កម្លាំងសំខាន់នៅតំបន់ការពារនេះហើយ ទើបបានជាពេលនេះក្រុមរបស់លោក Thomas Tuchel កំពុងស្វែងរកខ្សែការពារថ្មីមក។ លោកបានចាប់អារម្មណ៍ទៅលើកីឡាករ Kurzawa របស់ក្រុម PSG ដែលលោកធ្លាប់ដឹកនាំ។ ស្របពេលកីឡាករបារាំងរូបនេះ ទើបលេងបាន១ប្រកួតប៉ុណ្ណោះ ក្រោមការដឹកនាំរបស់អ្នកចាត់ការ Mauricio Pochettino ។
លោក Tuchel មានបំណងចង់ខ្ចីជើងកីឡាករវ័យ២៩ឆ្នាំខាងលើរហូតដល់ចប់រដូវកាល។ ខណៈដែលនេះក៏ជាឱកាសល្អសម្រាប់ PSG ដើម្បីបញ្ចេញកីឡាករដែលខ្លួនលែងប្រើប្រាស់ហើយដែរ។ យ៉ាងណាការប្រកាសផ្លូវការណាមួយនៅមិនទាន់សម្រេចនោះទេ ព្រោះនៅមានលក្ខខណ្ឌផ្ទាល់ខ្លួនជាច្រើនទៀតដែលត្រូវពិភាក្សាបន្ដ៕ប្រភព Dailymail
