ក្រោយចប់រដូវកាល ២០២០/២១ សម្រាប់ការប្រកួតនៅពានរង្វាន់នានាក្នុងតំបន់អឺរ៉ុបក៏ត្រូវផ្អាកសិន ហើយយើងក៏ដល់ពេលបង្វែរមកទស្សនាការលេងរបស់ក្រុមជម្រើសជាតិវិញម្តង។ មានព្រឹត្តិការណ៍ធំ ២ ដែលអាចកំដរអារម្មណ៍អ្នកគាំទ្រវិស័យកីឡាបាល់ទាត់ មុនឈានដល់ការបើករដូវកាលថ្មី នោះគឺ Copa Amercia ដែលជាការប្រជែងរវាងប្រទេសនៅប៉ែកអាមេរិកខាងត្បូង និង UEFA Euro ជាការប្រកួតសម្រាប់ប្រទេសនៅតំបន់អឺរ៉ុប។
ពាក់ព័ន្ធនឹងការប្រកួតជម្រើសជាតិ យើងក៏ច្បិចយកជ្រុងមួយមកបង្ហាញនៅអត្ថបទនេះ ដោយទាក់ទងនឹងទំហំប្រាក់ឈ្នួលដែលសហព័ន្ធបាល់ទាត់ប្រចាំប្រទេសនីមួយៗ បានផ្តល់ឲ្យគ្រូបង្វឹក ដែលរឿងនេះមិនសូវមានអ្នកដឹងនោះទេ ព្រោះកន្លងមកធ្លាប់ដឹងតែទំហំប្រាក់ឈ្នួលរបស់គ្រូបង្វឹកនៅក្លឹបកំពូលតែប៉ុណ្ណោះ។
ជាទូទៅអ្នកចាត់ការនៅជម្រើសជាតិមិនសូវធ្វើការធ្ងន់ដូចនៅក្លឹបឡើយ ព្រោះក្នុងមួយឆ្នាំត្រូវប្រមូលផ្តុំកីឡាករ ចូលរួមតែប៉ុន្មានប្រកួត ហើយបើនិយាយពីព្រឹត្តិការណ៍ធំៗ គឺរង់ចាំដល់ទៅ ២-៤ ឆ្នាំឯណោះទើបកើតឡើងម្តង។ អាយុកាលនៃការដឹកនាំរបស់គ្រូជម្រើសជាតិ ក៏រមែងមានថេរវេលាយូរជាង និងមិនសូវមានសម្ពាធដូចបណ្តាគ្រូនៅក្លឹបកំពូលឡើយ។ តាមរបាយការណ៍ពី Statista យើងបង្ហាញអ្នកចាត់ការក្រុមជម្រើសជាតិទាំង ៥ ដែលទទួលបានប្រាក់ឈ្នួលខ្ពស់ជាងគេបង្អស់៖
៥) Fernando Santos ក្រុមជម្រើសជាតិព័រទុយហ្គាល់
បុរសវ័យ ៦៦ ឆ្នាំ បានប្តូរមកដឹកនាំនៅក្រុមជម្រើសជាតិតាំងពីឆ្នាំ ២០១៤ ខណៈសុពលភាពកុងត្រារបស់លោកអាចមានរយៈពេលដល់ចុងខែកក្កដា ឆ្នាំ ២០២៤។
ចន្លោះពេលជាង ៧ ឆ្នាំមកនេះ Santos បានដឹកនាំឲ្យព័រទុយហ្គាល់ឈ្នះពាន Euro និង Nations League របស់ UEFA បាន ១ លើក។ ឆ្លងកាត់ ៨២ ប្រកួត លោកដឹកនាំឈ្នះ ៥២ ស្មើ ១៧ និងចាញ់ ១៣។ Santos ក្នុងមួយឆ្នាំទទួលបានប្រាក់ ២,៧៤ លានដុល្លារពីជម្រើសជាតិព័រទុយហ្គាល់។
៤) Stanislav Cherchesov ក្រុមជម្រើសជាតិរុស្ស៊ី
ក្រោយឆ្លងកាត់ការដឹកនាំនៅក្លឹបកម្រិតអាជីពក្នុងប្រទេសរុស្ស៊ីជាបន្តបន្ទាប់អស់រយៈពេល ១០ ឆ្នាំ ទីបំផុតលោក Cherchevsov ក៏បានចាប់យកឱកាសមកក្លាយជាអ្នកចាត់ការនៅជម្រើសជាតិរុស្ស៊ីកាលពីឆ្នាំ ២០១៦។
សុពលភាពកុងត្រារបស់បុរសវ័យ ៥២ ឆ្នាំ ត្រូវផុតនៅឆ្នាំក្រោយ ២០២២។ យ៉ាងណា Cherchevsov រកបានច្រើនជាងគ្រូនៅព័រទុយហ្គាល់ទៅទៀត ដោយក្នុងមួយឆ្នាំលោកទទួលបាន ៣,០៥ លានដុល្លារ។
៣) Tite ក្រុមជម្រើសជាតិប្រេស៊ីល
ក្នុងអាជីពជាអ្នកចាត់ការ លោក Tite ស្ម័គ្រស្មោះជាមួយវិស័យបាល់ទាត់នៅប្រេស៊ីលតាំងពីឆ្នាំ ១៩៩០ មកទល់សព្វថ្ងៃ។ លោកធ្លាប់ទៅដឹកនាំក្លឹបក្រៅតំបន់ ដូចជានៅអារ៉ាប់រួមបាន ២ ឆ្នាំគត់ ហើយចុងក្រោយនេះលោកដឹកនាំក្រុមជម្រើសជាតិប្រេស៊ីល ដោយក្នុងមួយឆ្នាំទទួលបានប្រាក់ ៤,២៧ លានដុល្លារ។
ជោគជ័យធំដែល Tite ធ្លាប់ទទួលបានជាមួយក្រុមសាំបាប្រេស៊ីលគឺនៅពានរង្វាន់ Copa America កាលពីឆ្នាំ ២០១៩។ សុពលភាពកុងត្រារបស់បុរសវ័យ ៦០ ឆ្នាំត្រូវផុតនៅចុងខែធ្នូ ឆ្នាំ ២០២២។
២) Didier Deschamps ក្រុមជម្រើសជាតិបារាំង
ជាអ្នកចាត់ការជម្រើសជាតិជោគជ័យជាងគេបង្អស់មួយក្នុងចំណោមឈ្មោះអ្នកទាំង ៥។ រយៈពេល ១០ ឆ្នាំជាមួយមាន់គកបារាំង Deschamps អាចមានឱកាសដឹកនាំក្រុមឲ្យឈ្នះពាន FIFA World Cup ១ លើក ហើយប៊ិះតែបានឈ្នះពាន Euro កាលពីឆ្នាំ ២០១៦ តែចាញ់នៅវគ្គផ្ដាច់ព្រ័ត្រ ក្រោមថ្វីជើងក្រុមព័រទុយហ្គាល់។ បុរសវ័យ ៥២ ឆ្នាំទទួលបានប្រាក់ឈ្នួលស្មើនឹង Tite ដែរ នោះគឺ ៤,២៧ លានដុល្លារ។
១) Joachim Low ក្រុមជម្រើសជាតិអាល្លឺម៉ង់
Low ជាគ្រូដែលមានអាយុកាលដឹកនាំយូរជាងគេបង្អស់ ហើយក៏ជោគជ័យជាងគេបង្អស់ដែរ។ លោកចូលដឹកនាំអាល្លឺម៉ង់តាំងពីឆ្នាំ ២០០៦ ហើយត្រៀមនឹងចាកចេញពីតំណែងក្រោយចប់ព្រឹត្តិការណ៍ Euro នៅខែកក្កដាខាងមុខ។
ត្រលប់ទៅអតីតកាល Low ធ្លាប់ដឹកនាំអាល្លឺម៉ង់ឲ្យលើកពាន FIFA World Cup នៅឆ្នាំ ២០១៤ និង FIFA Confederations Cup នៅឆ្នាំ ២០១៧។ ក្នុងមួយឆ្នាំបុរសវ័យ ៦១ ឆ្នាំទទួលបានប្រាក់ ៤,៧០ លានដុល្លារ៕
ប្រភព៖ Statista