ក្រុមបាល់ទាត់ Cambodian Fan Club All Stars ឬហៅកាត់ CFA មុននេះបន្តិចបានខ្សឹបប្រាប់ CTS Sports ពីការចូលរួមរបស់សមាជិកថ្មីក្នុងក្រុមមួយរូប នោះគឺកីឡាករ អ៊ុយ វុត្ថា។ នេះបើតាមការបញ្ជាក់ពីអ្នកតំណាងក្រុម លោក អៃ សំអូន។
ខ្សែការពារអាយុ ២៣ ឆ្នាំរូបនេះ ធ្លាប់ជាអតីតយុវជនរបស់ក្លឹបបឹងកេត និងធ្លាប់លេងឲ្យក្រុមអាកាសចរស៊ីវិល មុនផ្ទេរមកចូលរួមនៅ CFA។
បញ្ជាក់ថាកន្លងទៅ CFA ក៏ទើបតែស្វាគមន៍ការមកដល់របស់អ្នកចាំទីថ្មី ដែលជាអតីតយុវជននៅបឹងកេតនិងក្រសួងការពារជាតិ គឺកីឡាករ សែម ច័ន្ទវិចិត្រ។ នៅការបង្ហាញខ្លួនប៉ុន្មានប្រកួតដំបូងនេះ រូបគេក៏ជាចំណែកជួយក្រុមឲ្យទទួលបានជ័យជម្នះ នៅប្រកួតមិត្តភាពមួយទល់ Level Pro-FT ដែលបានយកឈ្នះក្នុងលទ្ធផល ៩-១ ផងដែរ៕