ក្លឹប Real Madrid បានតែងតាំងលោក Julen Lopetegui គ្រូបង្វឹកក្រុមជម្រើសជាតិអេស្ប៉ាញ មកដឹកនាំក្រុមរបស់ពួកគេហើយ ក្រោយពីចប់ព្រឹត្តិការណ៍ World Cup 2018 នេះ។
វត្តមានរបស់ Julen នឹងដឹកនាំក្រុម Real Madrid ៣រដូវកាល។ លោកជាអតីតអ្នកចាំទីរបស់ Real Madrid ប៉ុន្តែក៏ធ្លាប់លេងឱ្យក្លឹប FC Barcelona ផងដែរ។ អតីតអ្នកចាត់ការក្រុម Porto រូបនេះ មានទំនាក់ទំនងល្អណាស់ជាមួយអ្នកចាំទី De Gea ដែលក្លឹប Real តាមទិញពីក្រុម Manchester United ជាច្រើនដងមកហើយនោះ។ ដូច្នេះលោកអាចនឹងប្រើទំនាក់ទំនងនេះ ដើម្បីនាំអ្នកចាំទីដៃទី១អេស្ប៉ាញ ឱ្យលេងនៅ Real បាន។
យ៉ាងណាមិញ ការតែងតាំងគ្រូបង្វឹកថ្មីនេះដែរ អាចនឹងប៉ះពាល់ជាមួយអនាគត Bale ច្រើនជាង។ ត្បិតអី Julen អាចនឹងប្រើកីឡាករអេស្ប៉ាញច្រើន ដែលស្គាល់ចិត្តស្គាល់ថ្លើមគ្នា។ យ៉ាងណាមិញ អ្នកចាត់ការថ្មីនេះ មិនទាន់បាននិយាយអ្វីច្រើនទេ ត្បិតអីលោកកំពុងគិតទៅលើការដឹកនាំក្រុមអេស្ប៉ាញច្រើនជាងនៅព្រឹត្តិការណ៍ World Cup 2018 ដែលចាប់ផ្ដើមនៅថ្ងៃស្អែកនេះ៕ប្រភព៖ DailyMail
