លោក Antonio Conte បាននិយាយថាក្រុមមន្ត្រីអាជ្ញាកណ្ដាលនៅអង់គ្លេស គួរតែរៀនប្រើវីដេអូជំនួយការអាជ្ញាកណ្ដាលម្ដងទៀត ក្រោយពីលោកមើលឃើញថាមានចំណុចខ្វះខាតច្រើន។
ក្រុម Spurs លេងបានត្រឹមស្មើជាមួយក្រុម West Ham ក្នុងលទ្ធផល ១-១ ប៉ុណ្ណោះសម្រាប់ការប្រកួតសប្ដាហ៍ទី៥នេះ។ ស្របពេលលទ្ធផលនេះដែរ បានធ្វើឱ្យលោក Antonio Conte មិនសប្បាយចិត្តនោះទេ។ លោកបានអះអាងថាប្រកួតនេះ ក្រុមរបស់លោកសមនឹងទទួលបានជ័យជម្នះ ព្រោះពួកគេធ្វើបានល្អ ហើយក៏សមបានបាល់ប៉េណាល់ទី១គ្រាប់ផងដែរ។ ដោយ Aaron Cresswell មានបាល់ប៉ះដៃនៅប្រអប់គ្រោះថ្នាក់ តែចុងក្រោយអាជ្ញាកណ្ដាលមិនឱ្យវិញ ក្រោយពីត្រួតពិនិត្យ VAR ទៅ។
ចំណុចនេះ ត្រូវបានលោក Conte អះអាងថាមិនសមហេតុផលនោះទេ។ លោកថា បើសិនអាជ្ញាកណ្ដាលសម្រេចហើយ នោះមិនគួរឱ្យមានការពិនិត្យ VAR ម្ដងហើយ ម្ដងទៀតនោះឡើយ។ អាជ្ញាកណ្ដាលក្នុងទីលាន ជាអ្នកសម្រេចចិត្ត ពួកគេគួរតែគោរពតាមការសម្រេចចិត្តនេះ។ ក្រុមមន្ត្រីបច្ចេកទេស គួរតែរៀនប្រើ VAR ឱ្យបានលម្អិតជាងនេះ៕