ក្លឹបកាំភ្លើងធំ Arsenal បានយកឈ្នះ នៅលទ្ធផល ៤-០ ទៅលើ Chelsea ដោយជ័យជម្នះនេះ បានធ្វើទុក្ខដល់អ្នកគាំទ្រតោខៀវមួយទំហឹង ទាំងសូម្បីអ្នកចាត់ការក៏មិនស្រួលចិត្តដែរ ដ្បិតអីកាលបរិច្ឆេទចាប់ផ្តើមរដូវកាលថ្មី នៅសល់មិនដល់ពីរសប្តាហ៍ទៀតផង។
ងាកទៅប្រកួតនោះ ក៏មានវត្តមានកីឡាករចំណូលថ្មី Oleksandr Zinchenko បង្ហាញខ្លួនផងដែរ ហើយឃើញប្រើប្រាស់អាវលេខ ៣៥ ដែលកន្លងមកជាលេខអាវចាស់របស់កីឡាករ Mohamed Elneny និង Gabriel Martinelli។ កន្លងមកនៅវីដេអូការហ្វឹកហាត់ ក៏កីឡាករអ៊ុយក្រែនបានរៀបរាប់ដែរថា៖ “សួស្តីអ្នកគាំទ្រក្លឹបកាំភ្លើងធំ ខ្ញុំទើបតែបញ្ចប់ការហ្វឹកហាត់ដំណាក់កាលដំបូង ខ្ញុំពិតជារីករាយនឹងការឈរជើងនៅទីនេះ ដោយខ្ញុំនឹងក្លាយជាម្ចាស់អាវលេខ ៣៥ សម្រាប់អ្នកនៅពេលខាងមុខ”។
បញ្ជាក់ឲ្យដឹងថា Arsenal នៅសល់ប្រកួតមិត្តភាពមួយផ្សេងទៀត នោះគឺការប៉ះ Sevilla ជាប្រកួតពាន Emirates Cup នាថ្ងៃទី ៣០ កក្កដា មុនសម្រាកជិតមួយសប្ដាហ៍ ដើម្បីត្រៀមខ្លួនបើកឆាកជុំដំបូងនៅ Premier League គឺការលេងប៉ះ Crystal Palace នាវេលាម៉ោង ០២:០០ នាទីទាបភ្លឺ ឈានចូលថ្ងៃទី ៦ សីហា មានផ្សាយផ្ទាល់លើទំព័រ CTS SPORT៕
ប្រភព៖ Metro