អ្នកចាត់ការលោក Thomas Tuchel បានបង្ហាញការមិនពេញចិត្ត និងបន្ទោសទៅកាន់កីឡាករក្នុងក្រុម អំពីការបង្ហាញទម្រង់លេងមិនល្អ ដល់នាំឲ្យក្រុមរងបរាជ័យក្រោមលទ្ធផល ០-៤ ទល់ក្លឹប Arsenal នៅឯប្រកួតមិត្តភាព ក្នុងទឹកដីសហរដ្ឋអាមេរិក។ តោខៀវមិនអាចតបតរួចសូម្បីមួយគ្រាប់ ខណៈកាំភ្លើងធំ រកបានដោយ Gabriel Jesus, Martin Odegaard, Bukayo Saka និង Albert Sambi Lokonga។
បន្ទាប់ចប់ការប្រកួតនៅរដ្ឋ Florida អ្នកចាត់ការសញ្ជាតិអាល្លឺម៉ង់ លើកឡើងបែបនេះ៖ “យើងពិតជាមិនល្អគ្រប់គ្រាន់ទេ យើងមើលទៅមិនមានការប្រកួតប្រជែង ពោលផ្នែកនៃឆន្ទៈ កាយសម្បទា កម្លាំងចិត្ត គឺនៅទាបជាងឆ្ងាយណាស់ធៀបនឹង Arsenal ដូច្នេះខ្ញុំអត់អាចធានាបានទេ ថាយើងត្រៀមខ្លួនទាន់ពេលឬអត់ មុនការប្រកួតនៅពីរសប្ដាហ៍បន្ទាប់ [សំដៅទៅពាន Premier League]”។
រំឭកថា Chelsea ចប់ពីប្រកួតនេះទៅ ពួកគេត្រូវបន្តយុទ្ធនាការប្រកួតមិត្តភាពមួយចុងក្រោយផ្សេងទៀត គឺការប៉ះ Udinese នាថ្ងៃទី ៣០ កក្កដា មុនសម្រាកមួយសប្តាហ៍ សម្រាប់ការប្រកួត PL ចូលមកដល់ គឺបើកឆាកប៉ះ Everton នាវេលាម៉ោង ១១:៣០ នាទីយប់ ថ្ងៃទី ៦ សីហា៕
ប្រភព៖ Metro