អ្នកចាត់ការលោក Antonio Conte បានបង្ហាញការយល់ឃើញ ជុំវិញរឿងរ៉ាវ Harry Kane ដែលភាគីក្លឹប Bayern Munich បានបើកចំហនៅមុខអ្នកសារព័ត៌មាន ថាចាប់អារម្មណ៍លើគុណភាពកីឡាករអង់គ្លេសជាខ្លាំង ហើយថែមទាំងបង្ហើបតម្រុយចង់បានគេចេញពីក្លឹប Spurs ទៀតផង។
មិនថាតែនាយកជាន់ខ្ពស់ក្តី ដល់ថ្នាក់អ្នកចាត់ការលោក Julian Nagelsmann ក៏បាននិយាយកន្លងទៅថា៖ “ដ្បិតគេតម្លៃថ្លៃ តែ Kane ជាកីឡាករដ៏អស្ចារ្យម្នាក់ អាចលេងតំណែងប្រយុទ្ធកណ្តាលបានយ៉ាងល្អ ហើយក៏អាចទម្លាក់លេងតំណែងលេខ ១០ បានដែរ វាជារឿងអាចទៅរួច ការដែល Kane អាចរកបានគ្រាប់បាល់ជាច្រើននៅ Bundesliga ដូច្នេះដំណើរការទៅមុខបែបណាជាមួយ Bayern Munich យើងនឹងរង់ចាំមើលទាំងអស់គ្នា”។
ងាកទៅលោក Conte បាននិយាយថា៖ “ស្មោះត្រង់ទៅ សម្រាប់ខ្ញុំក្នុងនាមអ្នកចាត់ការ គឺអត់ចេះនិយាយដាច់ខាតរឿងកីឡាករក្លឹបដទៃ ដូច្នេះខ្ញុំអត់យល់ពីពួកគេទេ ហេតុអ្វីនិយាយបែបហ្នឹងទៅរួច បើជាខ្ញុំវិញ បើចង់បានគឺនឹងទៅប្រាប់ថ្នាក់លើឲ្យចាត់ចែង មិនមែនមកបើកចំហលើប្រព័ន្ធផ្សព្វផ្សាយបែបហ្នឹងទេ ចំពោះ Kane គេនៅជាផ្នែកមួយនៃផែនការណ៍ក្លឹប និងជាផ្នែកដ៏សំខាន់ ហើយគ្រប់យ៉ាងទាំងអស់សុទ្ធតែជាចចាមអារ៉ាមប៉ុណ្ណោះ”៕
ប្រភព៖ Metro