ខ្សែបម្រើ Casemiro ជាមិត្តរួមសញ្ជាតិប្រេស៊ីល នឹងតារាឆ្នើម Neymar Jr បានឆ្លើយតបទៅកាន់ចចាមអារ៉ាមដែលក្លឹបចង់លក់ចេញកីឡាករខាងលើ ថាបើខាងក្លឹបអាណាព្យាបាលលែងត្រូវការ ម្ល៉េះក្លឹបអធិរាជស នឹងចាំទទួលយកជានិច្ច។
បុរសវ័យ ៣០ ឆ្នាំនិយាយទៅប៉ុស្តិ៍ SporTV បែបនេះ៖ “Neymar គេអាចលេងឲ្យក្លឹបណាទាំងអស់ក្នុងលោក ប្រសិន PSG អត់ចង់បានគេទេ អ៊ីចឹង Real Madrid ចាំទទួលយក អូខេដែរទេ”។ បញ្ជាក់ឲ្យដឹង រវាង Casemiro និង Neymar មិនធ្លាប់លេងនៅក្លឹបអាជីពតែមួយទេ ពោលធ្លាប់តែជាគូសត្រូវ គ្រាខ្សែប្រយុទ្ធប្រេស៊ីល ឈរជើងឲ្យក្លឹប Barcelona។
អំពីសុពលភាពកុងត្រាដែលត្រូវបញ្ចប់ដល់ចុងខែមិថុនា ឆ្នាំ ២០២៧ សម្រាប់ Neymar នៅតែជាបន្ទុកធំសម្រាប់ PSG ពោលមួយអាទិត្យត្រូវចាយវាយលើថ្លៃពលកម្មដល់ទៅ ៦០០ ០០០ ផោនឯណោះ។ គ្រប់គ្នាកំពុងរង់ចាំមើល តើឆ្ពោះទៅរដូវកាលថ្មី Neymar នឹងអាចរក្សាវត្តមានរបស់គេ ដើម្បីបន្តក្តីស្រមៃឈ្នះពាន UCL ដែរឬយ៉ាងណា?
ប្រភព៖ SporTV