អនាគតរបស់ Raheem Sterling ទំនងជានឹងសម្រេចនាពេលដ៏ខ្លីខាងមុខ ហើយបើតាមចចាមអារ៉ាមខាងក្លឹបអាណាព្យាបាលមេឃខៀវ Manchester City ក៏បានគិតគូររកអ្នកត្រៀមមកបំពេញរួចស្រេច ហើយគេគឺជាកីឡាករនៅក្លឹប Bayern Munich មានបទពិសោធន៍លេងប្រយុទ្ធស្លាបយ៉ាងជំនាញ។
នោះគឺ Serge Gnabry ដោយម្ចាស់អាវលេខ ៧ កាលពីរដូវកាលចាស់ក៏រកបាន ១៤ គ្រាប់ ជាចំណែកជួយក្លឹបអាល្លឺម៉ង់លើកពានលីគកំពូល។ សុពលភាពកុងត្រានៅសល់តែ១២ ខែទៀតប៉ុណ្ណោះ ហើយលឺថាកីឡាករហាក់មិនចង់បន្តកុងត្រាថ្មី ពោលចង់អេះអុញរកផ្លូវបែក ទើបនាំឲ្យ City ហ៊ានចូលដាក់សំណើតែម្តងទៅ។
តាមរបាយការណ៍ពី The Sun ខាងក្លឹបនៅឯទីក្រុង Manchester បានត្រៀមកញ្ចប់ថវិកា និងលក្ខណៈរួចរាល់ហើយ ពោលចាំតែការចរចាតម្លៃសម្រេចមួយប៉ុណ្ណោះ។ បើតាមហាងឆេងអាចជាល្បាក់ ៣៥ លានផោន តែខាងក្រុមដឹកនាំដោយលោក Pep Guardiola ក៏នឹងត្រូវប្រជែងកិច្ចព្រមព្រៀងសំខាន់ៗផងដែរ ដ្បិតអីមានក្លឹបធំៗដូចជា Man Utd, Arsenal និង Liverpool ក៏ចង់បានអតីតសមាជិកកាំភ្លើងធំរូបនេះដូចគ្នា៕
ប្រភព៖ The Sun