ជាលើកដំបូងក្នុងប្រវត្តិសាស្ត្របាល់ទាត់ ដែលព្រឹត្តិការណ៍ FIFA World Cup បានកំណត់យកកាលបរិច្ឆេទនៅឯចុងឆ្នាំ ពោល ២០២២ សារនេះ កំណត់ធ្វើនៅចន្លោះថ្ងៃទី ២១ វិច្ឆិកា ដល់ ១៨ ធ្នូ ក្នុងទឹកដីតំបន់អាស៊ី នៃប្រទេសកាតារ។ ក្រៅតែពីបរិយាកាស និងសីតុណ្ហភាពខុសប្លែកសម្រាប់កីឡាករនៅតំបន់អឺរ៉ុប ក៏ដូចជាអាមេរិកឡាទីន ងាកមកច្បាប់ហាមប្រាមសម្រាប់អ្នកគាំទ្រ ក៏មើលទៅគួរឲ្យចាប់អារម្មណ៍ផងដែរ។
មិនខ្វល់ថាអ្នក ជាអ្នកគាំទ្រមកពីណា មានលុយជិះយន្តហោះ ចាយវាយលើការទិញសំបុត្រតម្លៃថ្លៃប៉ុណ្ណា ដរាបណាកំពុងឈរជើងនៅទឹកដីប្រទេសកាតារ ចាំបាច់គឺត្រូវតែអនុវត្តទៅតាមក្បួនច្បាប់ដែលរដ្ឋាភិបាលបានកំណត់ នៅកំឡុងព្រឹត្តិការណ៍ World Cup នារយៈពេលជិត ១ ខែពេញ។ ខាងក្រោម CTS Sports បង្ហាញច្បាប់ ៣ របស់កាតារ ដែលអ្នកគាំទ្រមកពីបណ្តាប្រទេសទូទាំងសកលលោក ត្រូវដឹងឲ្យបានច្បាស់ មុនទៅចូលរួមទស្សនាការប្រកួតបាល់ទាត់នៅឯចុងឆ្នាំ៖
៣) ហាមរួមភេទក្រៅផ្លូវការ
មានន័យថា បើអ្នកមិនទាន់បានឆ្លងកាត់ការរៀបអាពាហ៍ពិពាហ៍នឹងគ្នា នោះហាមផ្តាច់ មិនឲ្យមានការរួមភេទកើតឡើងឡើយ ក្នុងទឹកដីប្រទេសកាតារ។ ប្រសិនជាហ៊ានល្មើស នោះក៏ត្រូវព្រមទទួលយកជាមុន នូវការប្រឈមជាប់ពន្ធនាគាររយៈពេល ៧ ឆ្នាំ។
អាជ្ញាធរប្រចាំតំបន់បានបញ្ជាក់បែបនេះ៖ “កាតារជាប្រទេសអភិរក្សនិយម ដូច្នេះការរួមភេទ គឺត្រូវបានហាមឃាត់ លើកលែងតែអ្នកជាប្តីប្រពន្ធស្របច្បាប់នឹងគ្នា អ៊ីចឹងត្រូវប្រាកដថា នឹងមិនមានករណី One-night Stand ឬការបង្កើតក្តីសុខក្រៅផ្លូវការមួយយប់ នៅព្រឹត្តិការណ៍សារនេះឡើយ ពោលអ្នកគាំទ្រទាំងអស់ត្រូវតែគោរពតាម បើពួកគេមិនចង់ប្រឈមនឹងការជាប់ពន្ធនាគារ”។
២) ហាមសកម្មភាពនៃការស្រលាញ់ភេទដូចគ្នា
លោក Nasser Al-Khater ប្រធានគណៈកម្មាធិការរៀបចំការប្រកួតបាល់ទាត់ពិភពលោកឆ្នាំ ២០២២ របស់កាតារ បានសង្កត់ធ្ងន់ថា អ្នកគាំទ្រគ្រប់ភេទទាំងអស់ នឹងទទួលបានការស្វាគមន៍យ៉ាងកក់ក្ដៅ គ្រាន់ថាត្រូវសម្របខ្លួនទៅតាមវប្បធម៌ប្រពៃណីរបស់ប្រទេសជាម្ចាស់ផ្ទះជាចាំបាច់ ពោលនឹងមិនអនុញ្ញាតឲ្យមានការបង្ហាញជាសាធារណៈនៅសកម្មភាព នៃការស្រលាញ់ភេទដូចគ្នាឡើយ។ មានន័យថា ការឱបថើប ឬកាយវិការមិនសមរម្យណាមួយ រវាងមនុស្សជាភេទដូចគ្នា នឹងត្រូវបានហាមប្រាម ហើយរាប់ចូលជាសកម្មភាពខុសច្បាប់។
១) ហាមការទទួលទានគ្រឿងស្រវឹង និងសារធាតុញៀនកូកាអ៊ីន
ប្រទេសមួយចំនួននៅអឺរ៉ុប ក៏ដូចជានៅតំបន់អាស៊ី គឺមានការអនុញ្ញាតឲ្យអ្នកគាំទ្រអាចយកគ្រឿងស្រវឹង និងសារធាតុញៀន ដូចជាបារី មកប្រើប្រាស់កំឡុងការប្រកួត តែយ៉ាងណានៅកាតារ គឺវាត្រូវបានហាមឃាត់ដាច់ខាត។
បញ្ជាក់ឲ្យដឹងថា ច្បាប់ហាមប្រាមទាំង ៣ ចំណុចខាងលើ គឺបានប្រកាសរួចរាល់ហើយ តែយ៉ាងណាបើមានការតវ៉ា ឬត្រូវកែប្រែត្រង់ចំណុចណា ក៏ CTS Sports នឹងធ្វើការអាប់ដែតម្តងទៀតនៅពេលក្រោយ។ ចុះសម្រាប់គ្នាយើង ប្រសិនជាមានឱកាស តើអាចបង្អត់ ៣ ចំណុចខាងលើ ដើម្បីប្តូរទៅទស្សនា World Cup សារនេះ ដែរឬទេ?
ប្រភព៖ បរទេស