ធ្មេចបើកជិត ៨ ខែបាត់ ដែល Champions League រដូវកាល ២០២៣/២៤ បានដំណើរការ ហើយមកទល់ថ្ងៃនេះម៉ោងនេះ យើងក៏សម្រេចរកឃើញ ២ ក្លឹបចុងក្រោយឡើងមកកាន់វគ្គផ្តាច់ព្រ័ត្រ កំណត់មានមួយកាន់ពានរង្វាន់នាមម្ចាស់ជើងឯក នៅឯកីឡដ្ឋាន Wembley Stadium ក្នុងទីក្រុងឡុង ចក្រភពអង់គ្លេស តាមកាលបរិច្ឆេទកំណត់គឺថ្ងៃទី ០១ មិថុនាឆ្នាំ ២០២៤ ក៏នឹងមានផ្សាយបន្តផ្ទាល់លើទំព័រ CTS SPORTS។
គូត្រូវប៉ះគ្នាសារនេះ រាប់បានជាការជួបលើកដំបូងរវាងក្លឹបទាំងពីរនៅវគ្គផ្ដាច់ព្រ័ត្រ នោះគឺអធិរាជសអេស្ប៉ាញ Real Madrid ត្រូវមកតតាំងជញ្ជាំងយក្សអាល្លឺម៉ង់ Borussia Dortmund បន្ទាប់ក្លឹបសងខាងទម្លាក់សុទ្ធតែគីឡូធ្ងន់ Paris Saint-Germain និង Bayern Munich។
ដូចបញ្ជាក់ការជួបនៅវគ្គ Final គឺវាថ្មីសន្លាងហើយ សម្រាប់ជំនួប Real-Dortund តែបើការជួបនៅវគ្គក្រោមៗនោះ ហៅថារាប់ភ្លេច ត្រង់សរុបធ្លាប់បានសាកជើងគ្នា ១៤ លើក ខាង Real ឈ្នះ ៦ Dortmund ឈ្នះ ៣ និងកាត់កងស្មើគ្នា ៥។ ម្ខាងធ្លាប់ឈ្នះជើងឯក ១ លើក នៅរដូវកាល ១៩៩៦/៩៧ និងម្ខាងទៀតជាស្តេចពានអឺរ៉ុប ឈ្នះ ១៤ សម័យ ហើយលើកចុងក្រោយខកខានកាល ២ ឆ្នាំមុន។ ម្ល៉េះរវាងពួកគេ នឹងមានមួយត្រូវកែតួលេខទៅជាម្ចាស់ជើងឯក ២ សម័យ និងមួយទៀតចូលដល់តួលេខទី ១៥។
និយាយដល់ ៤ ប្រកួតចុងក្រោយ យើងក្រឡេកទៅរដូវកាល ២០១៦/១៧ ស្តេចស ប៉ះជញ្ជាំងលឿងពីរជើងក្នុងពូល F វគ្គចែកពូល គឺស្មើ ២-២ ទាំងពីរជើង ហើយឆ្លងទៅរដូវកាលបន្ទាប់ដូចជានិស្ស័យ ក៏ទៅជួបគ្នាទៀត ក្នុងពូល H ត្រង់ជើងមួយ Real ហូប ៣-១ និងជើងពីរ Real ហូបទៀត ៣-២ សរុប ៦-៣ ជាការឈ្នះក្រែលគួរសម។
ឥឡូវយើងលើករឿងគួរឲ្យចាប់អារម្មណ៍ចុងក្រោយបន្តិចទាក់ទងនឹងក្លឹបដឹកនាំដោយអ្នកចាត់ការលោក Edin Terzic ដែលការត្រលប់មកវគ្គផ្តាច់ព្រ័ត្រ UCL បានខកខានតាំងថ្ងៃទី ២៥ ខែឧសភា ឆ្នាំ ២០១៣ ចុងក្រោយនោះគឺប៉ះ Bayern Munich ចាញ់ ២-១ នាវគ្គផ្តាច់ព្រ័ត្រ ឥឡូវសារមក ១១ ឆ្នាំក្រោយនៅ Wembley ម្តងទៀតហើយ សារនេះមកភ្លក់រសជាតិថ្មីសុទ្ធសាធ ដែលជាបទពិសោធន៍គ្រប់គ្នាខ្លាចរអានឹងជួប ត្រង់ក្លឹបមកពីទីក្រុង Madrid នៅសតវត្សទី ២១ ឲ្យតែបានឡើងមកវគ្គផ្តាច់ព្រ័ត្រ គឺគ្មានម្តងណា ដែលត្រលប់ទៅផ្ទះវិញដោយអត់ពានកាន់នោះទេ ពោលឲ្យតែឡើងគឺឈ្នះ។
ពេលវេលាសារនេះ វាអាចជារជ្ជកាលចុងក្រោយក្នុងការកាន់ពានអឺរ៉ុប សម្រាប់ Legend កាន់ឆ្នាំ ៣ រូបនៅ Madrid មាន Toni Kroos, Luka Modric និង Nacho Fernandez ដែលអាចនឹងចាកចេញត្រឹមបិទរដូវក្តៅខាងមុខ។ ដូចគ្នាទាំងសម្រាប់ Marco Reus និង Mats Hummels ជាបុរសស្មោះនឹងក្លឹប Dortmund ជាខ្លាំង ដូចកាលឆ្នាំ ២០១៣ ពួកគេជាអ្នកឈរជើងជួយក្លឹបសារនោះ តែបរាជ័យ ឥឡូវបកមក ២០២៤ នឹងមានឱកាសអង្រួន Wembley ម្តងទៀត ក្រោមចម្លើយពីរគត់ គឺមួយអាចបានកាន់ពានដំបូងក្នុងអាជីព និងមួយទៀត បន្តជាប់បណ្តាសារគ្មានឱកាសប៉ះពានអឺរ៉ុប៕
ប្រភព៖ បរទេស