អ៊ីតាលី ស៊ុត ៣២ លើក គ្រប់គ្រងបាល់ ៦៦ ភាគរយ តែសំណាងមិនល្អ ដូចចាញ់បារមីក្រុមភ្ញៀវ បែរជាត្រូវភ្លាត់ចាញ់ក្រោមលទ្ធផល ០-១ នៅបាល់ចុងម៉ោងរបស់កីឡាករ Aleksandar Trajkovski ជាហេតុនាំឲ្យក្រុមជម្រើសជាតិម៉ាសេដូនខាងជើង អាចបន្តឱកាស ឆ្ពោះទៅវគ្គ Play-off ចុងក្រោយ កំណត់ប៉ះក្រុមព័រទុយហ្គាល់ ដែលបានយកឈ្នះទៅលើទួរគី។
កាលបរិច្ឆេទប្រកួតរវាងព័រទុយហ្គាល់ និងម៉ាសេដូនខាងជើង ត្រូវលេងនៅវេលាម៉ោង ១:៤៥ នាទីទាបភ្លឺ ឈានចូលថ្ងៃពុធទី ៣០ មិនា នឹងមានផ្សាយផ្ទាល់លើទំព័រ CTS Sports។ ការប្រកួតសារនេះ បើក្រុមណាឈ្នះ នោះនឹងទទួលបានកៅអីឆ្ពោះទៅចូលរួមព្រឹត្តិការណ៍ចុងឆ្នាំ World Cup 2022 ដែលកាតារធ្វើជាម្ចាស់ផ្ទះ។
ជុំវិញរឿងរ៉ាវនេះ ម៉ាសេដូនខាងជើង ក៏កំពុងទទួលបានការគាំទ្រ និងលើកទឹកចិត្តយ៉ាងពេញទំហឹង ពីសំណាក់ប្រធានាធិបតីប្រចាំផ្ទៃប្រទេស គឺលោក Stevo Pendarovski ព្រោះអីបើជម្រើសជាតិខ្លួនឡើង នោះគឺជាលើកដំបូងក្នុងប្រវត្តិសាស្ត្រ ហើយជាលើកទី ១៤ សម្រាប់ព័រទុយហ្គាល់ ដែលខកខានយកមិនបានកៅអីទៅចូលរួម។
ងាកទៅការលើកឡើងរបស់ប្រធានាធិបតីវ័យ ៥៨ ឆ្នាំខាងលើ ក៏បានចេញសារព្រមានជាមុន ទៅកំពូលកីឡាករ Cristiano Ronaldo ផងដែរ ថាអ្នកបន្ទាប់ដែលត្រូវម៉ាសេដូនទម្លាក់ នោះគឺអាចជាព័រទុយហ្គាល់។ លោក Stevo និយាយបែបនេះ៖ “នេះគឺជាពេលវេលារបស់ពួកយើង យើងសល់តែមួយជំហានទៀតប៉ុណ្ណោះ ដើម្បីឆ្ពោះទៅព្រឹត្តិការណ៍ World Cup នៅឯប្រទេសកាតារ ដោយយើងពិតជារីករាយនូវសមិទ្ធផលដែលអ្នករាល់គ្នាបានសម្រេច”។
លោកសង្កត់ធ្ងន់មួយម៉ាត់យ៉ាងខ្លី៖ “Cristiano ត្រៀមខ្លួនឲ្យហើយទៅ អ្នកដែលបរាជ័យបន្ទាប់ គឺអាចជាក្រុមរបស់អ្នក”។
ក្រវែលជុំវិញជ្រុងទាក់ទងនឹង World Cup ងាកទៅជម្រើសជាតិអាហ្សង់ទីនឯណោះ ក៏កំពុងទទួលបានតម្រុយ ដែលថា Lionel Messi អាចនឹងចូលនិវត្តនៅពេលដ៏ខ្លីខាងមុខផងដែរ។ បន្ទាប់យកឈ្នះ ៣-០ ទៅលើវេណេហ្ស៊ុយអេឡា នៅមុខអ្នកគាំទ្ររាប់មុឺននាក់ក្នុងទឹកដីខ្លួនឯង តារាឆ្នើមវ័យ ៣៤ ឆ្នាំ ក៏បាននិយាយពីភាពមិនប្រាកដប្រជា ហើយដំណើរសាទរសារនេះ អាចជាលើកចុងក្រោយ ក្នុងទឹកដីប្រទេសអាហ្សង់ទីន។
Messi ដែលបានចូលរួមចំណែករកមួយគ្រាប់ ឲ្យក្រុមលោក Lionel Scaloni បាននិយាយថា៖ “ខ្ញុំអត់ដឹងថាក្រោយចប់ World Cup ខ្ញុំនឹងធ្វើអ្វីទៀតទេ គ្រាន់ថា បន្ទាប់ពីចប់ភារកិច្ចនៅកាតារ ខ្ញុំនឹងពិចារណានូវរឿងរ៉ាវមួយចំនួន ខ្ញុំពិតជារីករាយពេលវេលានៅទីនេះ តាំងពីមុនឈ្នះពាន Copa ទៀតម្ល៉េះ ខ្ញុំចង់អរគុណដល់អ្នករាល់គ្នា ដែលធ្វើឲ្យខ្ញុំមានអារម្មណ៍កក់ក្តៅ រាល់ពេលមកដល់ទឹកដីអាហ្សង់ទីន”។
សួរនាំបន្តថាលោកនឹងបន្តទៀតឬអត់ជាមួយជម្រើសជាតិ ខណៈអាយុក៏ត្រៀមហៀរចូលវ័យ ៣៥ ឆ្នាំនៅខែមិថុនាខាងមុខ ក៏ស្រាប់តែ M10 ឆ្លើយ៖ “ការពិតបែបណា គឺខ្ញុំអត់ដឹងពិតមែន រឿងបន្ទាប់គឺមានតែរៀបចំខ្លួនសម្រាប់ការប្រកួតដែលកៀកមកដល់ គឺទល់អេក្វាឌ័រ”៕
ប្រភព៖ បរទេស