បើតាមរបាយការណ៍ពីសារព័ត៌មាន AS ចុះផ្សាយថា តារាឆ្នើម Neymar និង Sergio Ramos ហាក់គិតចង់ដើរចេញពីក្លឹបបារាំង Paris Saint-Germain ត្រឹមបញ្ចប់រដូវកាលនេះហើយ ជាពិសេសបន្ទាប់ពីទទួលពាក្យរិះគន់ពីអ្នកគាំទ្រក្លឹបខ្លួនឯង ក្រោយធ្លាក់ចេញពីការប្រកួត Champions League ក្រោមថ្វីជើង Real Madrid។
ករណីរបស់ Neymar គេហាក់ឈឺចាប់ខ្លាំងនឹងសំឡេងចំអករបស់អ្នកគាំទ្រនៅឯកីឡដ្ឋានថ្ងៃមុន ដោយគិតថា ស្ថានភាពនេះ នឹងមិនអាចផ្លាស់ប្តូរបានឡើយ ដោយអារម្មណ៍អ្នកគាំទ្រគឺនៅតែបន្តមិនអស់ចិត្តមកលើរូបលោក ដូច្នេះការចាកចេញ គួរតែនឹងកើតឡើង។ រីឯ Ramos ដោយសារមិនទទួលបានពេលវេលាលេង ព្រោះជួបបញ្ហារបួសដោយខ្លួនឯង អ៊ីចឹងបើបន្ត នោះអាជីពនឹងកាន់តែធ្លាក់ចុះ ពិបាកស្រោចស្រង់។
យើងមិនដឹងថា ខ្សែប្រយុទ្ធប្រេស៊ីល គិតចង់ផ្ទេរទៅទ្រនំបន្ទាប់ណាមួយទេ ដ្បិតអីសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៥ ឯណោះ។ រីឯហាងងឆេងតម្លៃខ្លួនក៏មិនទាប ពោលដល់ខ្ទង់ល្បាក់ ៩០ លានអឺរ៉ូ។ ចំពោះ Ramos វិញ សល់កុងត្រារយៈពេលខ្លី ដល់ចុងខែមិថុនា ឆ្នាំបន្ទាប់ ២០២៣ ហើយតម្លៃខ្លួន មិនដល់ ១០ លានអឺរ៉ូឡើយ៕
ប្រភព៖ AS