ជារឿងធម្មតាទេ ដែលរមែងកើតមានការប៉ះទង្គិចបន្តិចបន្តួច រាល់ពេលប្រកួតបាល់ទាត់ ប៉ុន្តែបើក្លាយជាកំហុសធ្ងន់ នោះគឺរាប់ជាកំហុសចេតនា មិនអាចលើកលែងបានឡើយ។ ថ្មីៗនេះកើតមានរឿងគួរឲ្យចាប់អារម្មណ៍មួយ នៅឯក្របខ័ណ្ឌលំដាប់ទី ៣ នៃបាល់ទាត់ប្រទេសថៃ ដែលលេងបាល់សុខៗ កីឡាករបែរជាប្រើក្បាច់មួយថៃ ឲ្យកែងទៅលើគូប្រជែង ហើយចុងក្រោយក្លឹបក៏សម្រេចដាក់ទណ្ឌកម្មធ្ងន់ធ្ងរផងដែរ។
នោះគឺ កំឡុងការប្រកួតរវាងក្លឹប Bangkok FC ពាក់ឈុតពណ៌ក្រហម ទល់ក្លឹប North Bangkok University FC ពាក់ឈុតពណ៌ខៀវ។ នៅចុងម៉ោងដែលក្រុមរងគ្រោះ នាំមុខ ៣-០ កៀកនឹងបញ្ចប់ ៩០ នាទីទៅហើយ ក៏ស្រាប់តែមានហេតុការណ៍ភ្ញាក់ផ្អើល ដោយកីឡាករគ្រោងឈុតក្រហម Aitsaret Noichaiboon មិនដឹងថាខឹងសម្បាអ្វីឲ្យប្រាកដ គេក៏បានដើរសំដៅមករកកីឡាករគ្រោងឈុតខៀវ Supasan Ruangsuphanimit ហើយស៊កកែងចូលពេញមុខ ដូចអ្នកចេះច្បាស់ប្រដាល់មួយថៃ នាំឲ្យកីឡាករក្រុមម្ខាងទៀត ដួលខ្ពោកទៅលើដី។
ពេលកើតហេតុភ្លាមនោះ អាជ្ញាកណ្តាលក៏រត់មកបញ្ឈប់ ហើយផ្លុំកញ្ចែលើកកាតក្រហម បណ្តេញ Noichaiboon ចេញពីការប្រកួត។ ខណៈដែលកីឡាកររងគ្រោះ ក៏ត្រូវបានដឹកទៅមន្ទីរពេទ្យ រួចដេរផ្នែកមុខដែលបែក អស់ ២៤ ថ្នេរ។
ចេតនានៃការបង្កកំហុសសារនេះ មិនត្រឹមតែទទួលបានកាតក្រហមធម្មតាៗនោះទេ ផ្ទុយទៅវិញ ក្លឹបអាណាព្យាបាល Bangkok FC បានដាក់ពិន័យធ្ងន់ក ដល់ថ្នាក់បណ្តេញកីឡាករចេញពីក្លឹបទាំងមិនញញើត។
សេចក្ដីថ្លែងការណ៍របស់ក្លឹប Bangkok FC សរសេរបែបនេះ៖ “ក្លឹបសូមប្រកាន់គោលជំហរ មិនគាំទ្រដាច់ខាតនូវសកម្មភាពរបស់កីឡាករ Noichaiboon ដូច្នេះក្លឹបក៏បានសម្រេចលុបចោលកិច្ចសន្យាជាមួយគេហើយ ពួកយើងក៏សូមចូលរួមបង្ហាញការសោកស្តាយចំពោះហេតុការណ៍នេះ ហើយក៏នឹងធ្វើគ្រប់យ៉ាង ដើម្បីធានាមិនឲ្យកើតមានករណីនេះម្តងទៀតនៅពេលខាងមុខ”។
Bangkok FC’s Aitsaret Noichaiboon sacked immediately after their match for this pic.twitter.com/qUMA9yzKDZ
— James Dart (@James_Dart) March 13, 2022
រីឯក្លឹបខាងកីឡាកររងគ្រោះ North Bangkok University FC ក៏បានសេចក្ដីថ្លែងការណ៍បែបនេះដែរថា៖ “កីឡាកររបស់យើង បានឆ្លងកាត់ការត្រួតពិនិត្យនៅមន្ទីរពេទ្យ បន្ទាប់ពីកីឡាករលេខ ៦ នៃក្លឹប Bangkok FC បង្កចេតនាវាយប្រហារមកលើផ្ទៃមុខ ដោយគ្រូពេទ្យបញ្ជាក់មកថា ផ្នែកតំបន់បបូរមាត់ខាងលើរបស់គេ គឺទទួលរងរបួសធ្ងន់ធ្ងរ ដូច្នេះត្រូវដេរ ២៤ ថ្នូរដើម្បីបិទបាំងមុខរបួស ចំពោះមុខក្លឹបនឹងផ្តល់ការថែទាំ និងទទួលខុសត្រូវ លើរឿងនេះ ហើយសង្ឃឹមថាគេនឹងជាសះស្បើយក្នុងពេលឆាប់ៗខាងមុខ”៕
ប្រភព៖ បរទេស