ក្លឹបបិសាចក្រហម Manchester United បម្រុងនឹងត្រូវបាត់បង់កីឡាករជាច្រើននៅទីផ្សារដោះដូររដូវក្តៅខាងមុខ ហើយចំណោមនោះ ក៏មានខ្ញីចាស់កាន់ឆ្នាំនៅក្លឹប គឺខ្សែបម្រើ Juan Mata មួយរូបផងដែរ។ សម្រាប់រដូវកាល ២០២១/២២ កីឡាករសញ្ជាតិអេស្ប៉ាញសឹងតែបាត់បង់ឱកាសទាំងស្រុង ពោលបង្ហាញខ្លួនបាន ៤ ប្រកួតគត់ឲ្យក្រុមដឹកនាំដោយលោក Ralf Rangnick។
បើទោះបីរដូវកាលមុន Mata បានចុះហត្ថលេខាបន្តកុងត្រាថ្មី ឲ្យក្លឹបម្ចាស់ដី Old Trafford តែមិនថាក្រោមការដឹកនាំរបស់គ្រូចាស់លោក Ole Gunnar Solskjaer រហូតចូលមកដល់គ្រូថ្មីសញ្ជាតិអាល្លឺម៉ង់ ក៏គេនៅតែមិនទទួលបានការចាប់អារម្មណ៍។
បើតាមសារព័ត៌មាន The Athletic ចុះផ្សាយ ខ្សែបម្រើខាងលើ ទំនងជានឹងចាកចេញនៅបញ្ចប់រដូវកាលនេះហើយ ស្របពេលដែលមានក្លឹបជាច្រើននៅក្របខ័ណ្ឌអេស្ប៉ាញ La Liga ពេញចិត្តគុណភាពរបស់គេ ពោលជឿថា អតីតកីឡាករ Chelsea រូបនេះ នឹងនៅតែមានទម្រង់លេងល្អដូចមុនដដែល។ រំឭកស្ថិតិឈរជើងតាំងពី ឆ្នាំ ២០១៤ សរុបការបង្ហាញខ្លួន ២៧៧ ប្រកួត រកបាន ៥១ គ្រាប់និង Assist ៤៧ លើក៕
ប្រភព៖ The Athletic