ក្រុម U23 វៀតណាម បានទទួលប្រាក់រង្វាន់លើកទឹកចិត្តរហូតដល់១២ម៉ឺនដុល្លារឯណោះ ចំពោះការឈ្នះពានរង្វាន់ AFF U23 Championship នៅកម្ពុជា។
ក្រុម U23 វៀតណាម មកលេងក្នុងពានរង្វាន់ខាងលើនេះ ដោយមានបញ្ហាច្រើនបំផុតទាក់ទងទៅនឹងកីឡាករកើតកូវីដ១៩តែម្ដង។ ពួកគេបានបញ្ជូនកីឡាករថ្មីមកជួយក្រុម២ទៅ៣លើក ទម្រាំអាចលេងដល់វគ្គផ្ដាច់ព្រ័ត្រនេះ។ ខណៈដែលការប្រកួតរបស់ក្រុមវៀតណាមនេះទៀតសោត ក៏ទទួលបានជ័យជម្នះរហូត ដល់ឈ្នះពានរង្វាន់តែម្ដង ដោយវគ្គផ្ដាច់ព្រ័ត្របានយកឈ្នះលើក្រុមថៃក្នុងលទ្ធផល ១-០។
ដោយសារតែការខិតខំរបស់ក្រុម U23 រហូតឈ្នះពាននេះដែរ ទើបបានជាសហព័ន្ធបាល់ទាត់វៀតណាម VFF សម្រេចផ្ដល់ប្រាក់រង្វាន់លើកទឹកចិត្តដល់ពួកគេចំនួន១២ម៉ឺនដុល្លារ។ ខណៈដែលសមាជិកក្រុមដែលចូលលេងពានរង្វាន់នេះសរុបបានកើនដល់៤៧នាក់ទាំងក្រុមការងារទៅហើយ។ ដោយបច្ចុប្បន្នមាន២៧នាក់អវិជ្ជមានកូវីដ១៩ ទៅដល់វៀតណាមវិញហើយ ខណៈដែល២០នាក់ទៀតនៅព្យាបាលនៅកម្ពុជា រហូតដល់ជាសះស្បើយទើបត្រលប់ទៅវិញ៕ប្រភព Zingnews
