ការចាយលុយនៅទីផ្សារដោះដូរខែមករា គឺមិនងាយចាយត្រូវនោះទេ តែយ៉ាងណាសម្រាប់ក្លឹប Liverpool រាប់បានថាភ្នែកមុត រើសប៉ះគ្រាប់ពេជ្រល្អ តាមរយៈការចំណាយ ៤៥ លានអឺរ៉ូ នាំយក Luis Diaz ចេញពីក្លឹប FC Porto។
ខ្សែប្រយុទ្ធស្លាបឆ្វេង វ័យ ២៥ ឆ្នាំ ដ្បិតទើបមកដល់បានជាង ១ ខែ តែនេះគេហាក់ទទួលបានការកោតសរសើរមិនដាច់ពីមាត់ ដល់ថ្នាក់អ្នកវិភាគខ្លះ ថា Diaz ប្រៀបដូចជាកូនហង្ស ធ្លាប់ឈរជើង ៤-៣ ឆ្នាំហើយអ៊ីចឹង។ ងាកមកក្នុងអត្ថបទនេះ ទំព័រ CTS Sports សូមធ្វើការជីកកកាយលើកមកបង្ហាញនូវការពិត និងអាថ៌កំបាំង ៣ យ៉ាងពីកីឡាករ Luis Diaz៖
៣) កើតក្នុងគ្រួសារក្រខ្សត់
Diaz កើតនៅតំបន់ព្រំដែនរវាងប្រទេសកូឡុំប៊ី និងវេណេហ្ស៊ុយអេឡា ហើយធំធាត់ឡើងជាមួយគ្រួសារដែលមានជីវភាពខ្វះខាតខ្លាំង។ គេស្ថិតនៅក្រុមមនុស្សជនជាតិ Yu ដែលប្រជាជនទាំងនេះ មិនសូវទទួលបានការយកចិត្តទុកដាក់ពីរដ្ឋាភិបាលដូចសហគមន៍ផ្សេងទៀតនោះទេ។
សូម្បីតែអាហារ ៣ ពេលក្នុងមួយថ្ងៃ ក៏ខ្សែប្រយុទ្ធខាងលើមិនទទួលបានគ្រប់គ្រាន់ផង ហើយគេក៏សឹងតែបាត់បង់ជីវិតម្តងៗ ដោយសាររាងកាយស្គមស្គាំង និងខ្វះអាហារូបត្ថម្ភ។ បញ្ជាក់បន្តិច នៅតំបន់ដែលជនជាតិ Yu រស់នៅ យ៉ាងហោចណាស់មានកុមារជិត ៥ ពាន់នាក់បានបាត់បង់ជីវិត ដោយសារកង្វះអាហារូបត្ថម្ភ នៅចន្លោះឆ្នាំ ២០០៨ ដល់ ២០១៦។
នៅការចាប់ផ្តើមដំបូងជាមួយវិស័យបាល់ទាត់ គេទទួលបានឱកាសទៅហ្វឹកហាត់នៅក្លឹបលីគលំដាប់ទាបក្នុងប្រទេស គឺ Barranquilla។ ពេលវេលានោះហើយ គេអាចទទួលបានអាហារហូបចុកគ្រប់គ្រាន់ ដល់ឡើងទម្ងន់ ១០ គីឡូ ល្មមនាំឲ្យកាយសម្បទាមើលទៅរឹងមាំដូចគេដូចឯង។
២) ជាប់ឈ្មោះជា “Ronaldo កូឡុំប៊ី” និង idol ក្នុងដួងចិត្ត
និយាយពី idol ក្នុងដួងចិត្ត គេក៏ដូចជាក្មេងឯទៀត ដែលភាគច្រើនយុវជនស្ថិតនៅប៉ែកអាមេរិកឡាទីន តែងតែស្រលាញ់គាំទ្រ Ronaldinho។ Diaz បានយកគំរូតាមវីរបុរសប្រេស៊ីល នូវរបៀបនៃការញាក់បាល់ និងបច្ចេកទេសនៃការគ្រប់គ្រងបាល់មួយចំនួន។
យ៉ាងណាដល់ពេលគេមានឱកាសចូលលេងឲ្យជម្រើសជាតិ Diaz ក៏ទទួលបានរហស្សនាមថ្មីជា “Ronaldo ជំនាន់ 2.0” ឬ “Ronaldo កូឡុំប៊ី”។ ក៏ដោយសារតែឆន្ទៈនៃការខិតខំប្រឹងប្រែងដែលគេមាន អមជាមួយនឹងទេពកោសល្យ ក៏ដូចជាសមិទ្ធផលដែលសម្រេចចេញមក គឺជោគជ័យដូចកាល Ronaldo នៅវ័យ ២០ ជាងអ៊ីចឹងដែរ។ រំឭកថា ខ្សែប្រយុទ្ធស្លាបឆ្វេងខាងលើ កន្លងទៅ ទើបតែជួយកូឡុំប៊ី ឲ្យយកបានលេខ ៣ នៅពាន Copa America 2021 ហើយក៏ជាកីឡាករ រកបាន ៤ គ្រាប់ស្មើនឹងកម្រិតរបស់ Lionel Messi។
១) ធ្លាប់មានក្លឹបនៅ PL ទាក់ទងតាំងពី ៣ ឆ្នាំមុន
មុនពេល Liverpool និង Tottenham ប្រជែងគ្នាចង់បាន ត្រលប់ទៅរដូវកាល ២០១៨/១៩ ក៏ធ្លាប់មានក្លឹប Cardiff City ចាប់អារម្មណ៍បុរសវ័យ ២៥ ឆ្នាំរូបនេះផងដែរ តែយ៉ាងណា សាមីខ្លួនបានបដិសេធ។
សារនោះ Diaz កំពុងឈរជើងឲ្យក្លឹប Junior FC នៅឯប្រទេសកំណើត ហើយដោយគិតចង់ដើរតាមគន្លង James Rodriguez និង Radamel Falcao គេក៏សម្រេចផ្ទេរទៅក្លឹប FC Porto មុនបោះជំហានមកកាន់ក្លឹបយក្ស Liverpool កាលពីពេលថ្មីៗនេះ៕
ប្រភព៖ MSN