បណ្ដាប្រទេសនៅតំបន់ជាច្រើនទូទាំងសកលលោក បានដាក់ទណ្ឌកម្មសឹងគ្រប់វិស័យទៅលើប្រទេសរុស្សី បន្ទាប់ពីផ្ទុះសង្គ្រាមឈ្លានពានរដ្ឋឯករាជ្យរបស់ប្រទេសអ៊ុយក្រែន ដែលនេះរាប់បានជាទង្វើបំពានច្បាប់អន្តរជាតិ។
ផ្សារភ្ជាប់មកក្នុងវិស័យកីឡាបាល់ទាត់ឯណេះ ឥទ្ធិពលនៃសង្គ្រាមសារនេះ ក៏បានជះផលប៉ះពាល់ដល់កេរ្តិ៍ឈ្មោះមហាសេដ្ឋីរុស្ស៊ី លោក Roman Abramovich ដែលជាម្ចាស់ក្លឹបបាល់ទាត់តោខៀវ Chelsea នៅឯចក្រភពអង់គ្លេស។ រដ្ឋាភិបាលអង់គ្លេសបានដាក់ទណ្ឌកម្ម តាមរយៈការបង្កកទ្រព្យសម្បត្តិម្ចាស់ក្លឹបវ័យ ៥៥ ឆ្នាំខាងលើ ដែលនេះធ្វើឲ្យអ្នកគាំទ្របាល់ទាត់ ជាពិសេសអ្នកគាំទ្រក្លឹបម្ចាស់ដី Stamford Bridge ពិតជាចង់ដឹងខ្លាំង ថាដំណើររឿងទៅមុខនឹងបែបណាខ្លះ ហើយអាចប៉ះពាល់អ្វីដែរឬទេដល់ក្លឹបទាំងមូល?
ជាការពិត Chelsea ក៏ទើបតែងើបមកជោគជ័យខ្លាំងនៅប៉ុន្មានឆ្នាំចុងក្រោយ ជាពិសេសក្រោយការមកកាន់កាប់របស់លោក Abramovich។ ចុះការផ្ទុះសង្គ្រាមសារនេះ តើតំណែងជាម្ចាស់ក្លឹប Chelsea នឹងត្រូវផ្លាស់ប្ដូរឬបែបណា?
ចម្លើយសាមញ្ញនិងងាយយល់ គឺ Roman Abramovich នឹងនៅតែជាម្ចាស់ក្លឹបមានមូលដ្ឋានក្នុងទីក្រុងឡុងដដែល គ្រាន់ថា សភាពការណ៍ទៅមុខ គឺរាងស្មុគស្មាញបន្តិច ហើយក៏មិនមាននរណាអាចទស្សន៍ទាយដឹងជាមុនបានដែរ ថាក្លឹបនឹងត្រូវផ្ទេរទៅឲ្យម្ចាស់ថ្មីកាន់កាប់ឬបែបណា? គ្រាន់ថាចម្លើយនៅពេលវេលានេះ លោក Abramovich ក៏មិនមានសិទ្ធលក់ក្លឹប Chelsea នោះដែរ ព្រោះអីរដ្ឋាភិបាលអង់គ្លេសបានដាក់ទណ្ឌកម្មបង្កកទ្រព្យសម្បត្តិទាំងអស់ ដែលជាប់ពាក់ព័ន្ធក្នុងទឹកដីប្រទេសរបស់ខ្លួន។
ដ្បិតមានឈ្មោះជាម្ចាស់ក្លឹប តែតួនាទីទាំងឡាយ លោក Abramovich បានសម្រេចផ្ទេរបណ្តោះអាសន្នទៅឲ្យក្រុមមូលនិធិប្រចាំក្លឹប ជាអ្នកគ្រប់គ្រងជំនួស។ តាមមូលហេតុដែលគេដឹង ព្រោះមិនចង់ឲ្យរងផលប៉ះពាល់ដល់កេរ្តិ៍ឈ្មោះក្លឹបទាំងមូល ដែលចោទថា មានបុគ្គលជាជនជាតិរុស្សីនៅដឹកនាំ។
ដូច្នេះក្រុមមូលនិធិប្រចាំក្លឹប មានលោក Bruce Buck និង John Devine ជាដើម នឹងទទួលបន្ទុកដោះស្រាយរាល់បញ្ហាដែលក្លឹបជួបប្រទះ ជាមួយនឹងក្រុមប្រឹក្សាភិបាល រួចផ្នែកសំខាន់ៗផ្សេងទៀត ដូចជាពាណិជ្ជកម្ម ហិរញ្ញវត្ថុជាដើម ក៏នឹងនៅតែដំណើរការជាធម្មតា។
សំណួរគួរឲ្យចាប់អារម្មណ៍មួយផ្សេងទៀត គឺត្រង់ថា តើ Chelsea នឹងអាចចុះហត្ថលេខានាំចូលកីឡាករកំពូលបន្តទៀតបានដែរឬទេ? ចម្លើយ៖ គឺវាមិនពាក់ព័ន្ធនឹងទំហំទ្រព្យរបស់ម្ចាស់ក្លឹបនោះទេ ពោលការចំណាយនានាទាំងអស់ គឺឆ្លងកាត់ច្បាប់ហិរញ្ញវត្ថុ FFP ប្រើប្រាស់ចេញពីចំណូលរួមរបស់ក្លឹប រកបានពីការលក់សិទ្ធផ្សព្វផ្សាយ ចំណូលក្រុមហ៊ុនឧបត្ថម្ភ សំបុត្រចូលទស្សនា និងការលក់ចេញកីឡាករជាដើម។
ដូច្នេះពេលទៅមុខ ក្លឹបក៏នឹងនៅតែអាចចរចានាំចូលកីឡាករកំពូលបានជាធម្មតា ប៉ុន្តែអ្វីដែលគេបារម្ភបំផុតនោះ គឺខ្លាចតែ Abramovich ត្រូវបង្ខំចិត្ត ចុះចេញពីតំណែង ហើយទាមទារនូវប្រាក់កម្ចីជាង ២ ពាន់លានដុល្លារ ដែលលោកបានវិនិយោគមកកាន់ក្លឹប នៅរយៈពេលជិត ២ ទសវត្សចុងក្រោយ នោះ Chelsea ប្រាកដជាវ័ណ្ឌកជាក់ជាមិនខាន។ យ៉ាងណាតាមការព្យាករណ៍គេជឿថា សេដ្ឋីរុស្ស៊ីខាងលើ ជាមនុស្សដែលស្រលាញ់ក្លឹបជាខ្លាំង ដូច្នេះបើមានរឿងអ្វីក៏លោកនឹងរិះរកគ្រប់វិធី ពោលមិនឲ្យក្លឹបមួយនេះ ធ្លាក់ទៅចំណុចសូន្យ ដូចកាលពីមុនឆ្នាំ ២០០៣ នោះទេ៕
ប្រភព៖ Goal