អតីតខ្សែការពារកណ្តាលនៃក្លឹបតោខៀវ Chelsea គឺលោក Frank Leboeuf បានជំរុញឲ្យតារាឆ្នើមនៃក្លឹប Man Utd កីឡាករ Cristiano Ronaldo គួរលៃលកចូលនិវត្តនៅពេលដ៏ខ្លីខាងមុខ ព្រោះអីខ្លួនមិនចង់ឃើញ CR7 បន្តធ្លាក់ទម្រង់លេងបែបនេះតទៅទៀតឡើយ។
បុរសវ័យ ៣៧ ឆ្នាំ ជាការពិតនៅរដូវកាល ២០២១/២២ បង្ហាញខ្លួន ៣០ ប្រកួត រកបាន ១៥ គ្រាប់ តែយ៉ាងណានេះជាតួលេខមិនល្អនោះទេ ជាក់ស្តែងដូចតាំងពីខែធ្នូ មកទល់ពេលចុងក្រោយ គឺទើបតែរកបាន ១ គ្រាប់គត់។ បើបន្តទៅមុខ ក្រុមក៏ប្រឈមនឹងរបូតកៅអី Top 4 នៅបញ្ចប់រដូវកាលថែមទៀត។
ប្រាប់ ESPN លោក Lebeouf និយាយ៖ “តើអ្នកដឹងទេ ខ្ញុំគិតថាគួរតែដល់ពេល Ronaldo គិតពីអនាគត គិតពីរឿងបញ្ចប់អាជីពហើយ ព្រោះខ្ញុំអត់ចង់ឃើញ Ronaldo បែបហ្នឹងទេ មើលទៅគួរឲ្យអាណិតណាស់ ទាំងដែលគេធ្លាប់តែជាកីឡាករស្ថិតនៅកម្រិតកំពូលអស់ពេលជាច្រើនឆ្នាំ ដូច្នេះខ្ញុំអត់ចង់ឃើញគេបន្តត្រឹមជាកីឡាករធម្មតាម្នាក់ឡើយ”។
លោកបន្ត៖ “ដូច្នេះទាន់គេមិនទាន់ធ្លាក់ចុះខ្លាំង គេគួរតែចូលនិវត្តនៅកម្រិតប៉ុណ្ណោះ ជាជាងព្យាយាមបន្ត ២ ទៅ ៣ ឆ្នាំទៀត ហើយខ្លាចល ថាមិនមែនស្ថិតនៅកម្រិតដូចដែលគេធ្លាប់ធ្វើបានកាលពីមុន”៕
ប្រភព៖ ESPN