ពានរង្វាន់ប្រចាំទ្វីបអាហ្រ្វិក AFCON 2021 ទីបំផុតបានរកឃើញក្រុមឈ្នះជើងឯក ដោយបានទៅលើជម្រើសជាតិសេណេហ្គាល់ ក្រោយយកឈ្នះទៅលើអេហ្សីបនាវគ្គផ្តាច់ព្រ័ត្រ។ បន្ទាប់ចប់ការប្រកួត ខាងគណៈរៀបចំកម្មវិធីក៏បានប្រកាសនូវឈុត ១១ រូបល្អបំផុត ប្រចាំព្រឹត្តិការណ៍ ហើយឃើញថាមានកីឡាករ Arsenal នៅក្នុងនោះផងដែរ។
នោះគឺ ខ្សែបម្រើ Mohamed Elneny នៃជម្រើសជាតិអេហ្សីប ដែលគេបានបង្ហាញខ្លួន ១២០ នាទី នៅ ៣ ប្រកួតសរុប។ បើទោះបី មិនបានរកគ្រាប់បាល់ ឬ Assist តែគុណភាពលេងរបស់សមាជិកក្លឹប Arsenal រូបនេះ ក៏បានចូលរួមចំណែកយ៉ាងសំខាន់ ក្នុងការរុញក្រុមឲ្យឡើងទៅកាន់វគ្គផ្តាច់ព្រ័ត្រ។
ក្រៅពី Elneny សម្រាប់តារាឆ្នើមនៅ Premier League ឯទៀត ដែលជាប់ឈ្មោះ មានដូចជា Mohamed Salah, Sadio Mane, Edouard Mendy និង Nampalys Mendy។ រំឭកថា អតីតកីឡាករនៃក្លឹប Basel នឹងត្រូវផុតកុងត្រានាបញ្ចប់រដូវកាលនេះហើយ ដូច្នេះតាមរយៈសមិទ្ធផលដែលគេធ្វើបានឲ្យជម្រើសជាតិ ថាមិនត្រូវ ក៏អាចនឹងទទួលបានកុងត្រាថ្មី ឬផ្លូវម្យ៉ាងទៀត ប្រហែលអាចត្រូវបានក្លឹបរួមលីគ Newcastle ចាប់អារម្មណ៍ចរចានាំយក៕
ប្រភព៖ Sportsmole