ក្រុមជម្រើសជាតិហ្គាបុង បានត្រឹមស្មើ ១-១ ទល់នឹងក្រុមជម្រើសជាតិហ្គាណា សម្រាប់ជុំទី ២ វគ្គចែកពូលពានរង្វាន់ Africa Cup of Nations នៅព្រឹកថ្ងៃសៅរ៍នេះ។ បច្ចុប្បន្នពួកគេឈរលេខ ២ មាន ៤ ពិន្ទុ នៅចាញ់ ២ ពិន្ទុធៀបនឹងក្រុមឈរលេខ ១ គឺម៉ារុក។
យ៉ាងណាប្រកួតរបស់ក្រុមហ្គាបុងសារនេះ គេឃើញអវត្តមាននៅតារាឆ្នើមដ៏សំខាន់ គឺ Pierre-Emerick Aubameyang ហើយតាមការឲ្យដឹងពីសហព័ន្ធបាល់ទាត់ប្រចាំទ្វីបអាហ្វ្រិក បញ្ជាក់ថា កីឡាកររបស់ក្លឹប Arsenal បន្ទាប់ពីទើបជាសះស្បើយជំងឺកូវីដ-១៩ គេក៏ស្រាប់តែរកឃើញថា មានបញ្ហាត្រង់ផ្នែកបេះដូង ដែលមិនទាន់ច្បាស់ថាជំងឺអ្វីឲ្យប្រាកដ។
តាមការបញ្ជាក់របស់សហព័ន្ធ គឺមានកីឡាករ ៣ រូប ដែលក្រោយជាសះស្បើយពីជំងឺកូវីដ ក៏ស្រាប់តែមានបញ្ហាមិនស្រួលត្រង់បេះដូង រួមមាន Aubameyang, Axel Meye និង Mario Lemina ដែលសុទ្ធសឹងជាកីឡាករហ្គាបុង ហេតុដូច្នេះទើបសម្រេចដកឈ្មោះរបស់ពួកគេ ជាជាងប្រថុយដាក់ឲ្យគេរត់លើទីលាន រហូតដល់ប្រឈមគ្រោះថ្នាក់ណាមួយ។ មិនច្បាស់ថា អ្នកទាំងបីនឹងសម្រាកដល់ថ្ងៃណាទេ ខណៈដែលប្រកួតជុំចុងក្រោយ របស់ហ្គាបុងដែលត្រូវប៉ះម៉ារ៉ុក នឹងចូលមកដល់នៅថ្ងៃទី ១៩ ខាងមុខហើយ៕
ប្រភព៖ Goal