ការចោទសួរ ឲ្យជ្រើសរើសរវាង Cristiano Ronaldo ឬ Lionel Messi គឺបានក្លាយជាសំណួរសាមញ្ញមួយទៅហើយក្នុងពិភពបាល់ទាត់។ នេះមិនត្រឹមសួរទៅកាន់អ្នកគាំទ្រទេ ទៀតសោតក៏ធ្លាប់លេចចេញជារឿយៗ មកសួរនាំដល់កីឡាករបាល់ទាត់ផ្ទាល់ផងដែរ។
ជាក់ស្តែងតាមរយៈកម្មវិធីឆ្លើយសំណួរ Q&A លើ Twitter កន្លងទៅនេះ កីឡាកររបស់ក្លឹប Man City គឺ Ilkay Gundogan ក៏ត្រូវបានអ្នកគាំទ្រចោទសួរផងដែរ អំពីការឲ្យជ្រើសរើសរវាងកំពូលកីឡាករទាំងពីរ។
ក៏ស្រាប់តែ Gundogan ឆ្លើយ៖ “តើវាអាចបានទេ បើឆ្លងកាត់ការលេង Q&A លើ Twitter ដោយមិនឆ្លើយសំណួរមួយនេះ? តែយ៉ាងណាខ្ញុំនៅតែឆ្លើយ គឺខ្ញុំជ្រើសយក Messi”។ គួរបញ្ជាក់ថា ក្នុងអាជីពរបស់កីឡាករអាល្លឺម៉ង់ គេមិនធ្លាប់បានរួមអាជីពជាមួយ Messi នោះទេ តែយ៉ាងណាក្រោមការដឹកនាំរបស់លោក Pep Guardiola ដែលជាអតីតគ្រូជំនិតរបស់ M10 ដូច្នេះក៏ជឿថា ចម្លើយប្រាកដជាបាក់ទៅខាងកីឡាករអាហ្សង់ទីនច្រើនជាងកីឡាករព័រទុយហ្គាល់ហើយ៕
ប្រភព៖ Sportskeeda