នៅកំឡុងទីផ្សារដោះដូររដូវរងា ដែលកំពុងបើកដំណើរការ ខាងក្លឹបហង្សក្រហម Liverpool ក៏រងចចាមអារ៉ាម ថាអាចលក់ចេញកីឡាករមួយចំនួនផងដែរ តែយ៉ាងណាក្នុងចំណោមអ្នកទាំងនោះ តាមការបញ្ជាក់ច្បាស់ពី លោក Jurgen Klopp បានសង្កត់ធ្ងន់ ថាអនាគតរបស់ Divock Origi គឺនឹងបន្តនៅ ពោលគ្មានការចាកចេញកើតឡើងឡើយ។
ស្របពេលដែលសុពលភាពកុងត្រាសេសសល់រយៈពេល ៦ ខែ កីឡាករបែលហ្សិកក៏លេចលឺថា អាចជាផ្ទេរទៅក្លឹបថ្មីណាមួយ នៅខែមករា ជាជាងការឈរជើងដល់ផុតកុងត្រា។ យ៉ាងណា អ្នកចាត់ការសញ្ជាតិអាល្លឺម៉ង់ បានបញ្ជាក់ប្រាប់គេហទំព័រផ្លូវការក្លឹប Liverpool មុននេះថា៖ “Divock គេកំពុងជួបបញ្ហារបួស ហើយកំពុងសម្រាកព្យាបាល តែយ៉ាងណាពីពេលនេះទៅ យើងសុំបញ្ជាក់ច្បាស់ ថាគេនឹងបន្តនៅជាមួយពួកយើង ហើយសង្ឃឹមថាគេនឹងជាសះស្បើយឆាប់ៗ”។
គួររំឭកថា ខ្សែប្រយុទ្ធវ័យ ២៦ ឆ្នាំ គេបានផ្ទេរមកចូលរួមជាមួយហង្ស កាលពីរដូវក្តៅ ឆ្នាំ ២០១៤។ សរុបស្ថិតិ បង្ហាញខ្លួន ១៦៧ ប្រកួត គេរកបាន ៤០ គ្រាប់និង Assist ១៦ លើក។ បើនិយាយពីភាគរយនៃក្លឹបបន្ទាប់ ដែល Origi អាចផ្ទេរចេញ អាចជាបណ្តាក្លឹបនៅ Premier League ឬ Serie A មានភាគរយខ្ពស់ជាងគេ៕
ប្រភព៖ Sportsmole