លោក Gary Neville បានរិះគន់ទៅលើខ្សែប្រយុទ្ធ Cristiano Ronaldo ក្រោយពីមិនអាចជួយក្រុមយកឈ្នះ Newcastle United កាលពីយប់មិញនេះ។
Ronaldo លេងពេញ៩០នាទីឱ្យក្រុម Man Utd ក្នុងការប្រកួតដែលពួកគេស្មើជាមួយក្រុម Newcastle United ១-១។ តែយ៉ាងណាមិញ កីឡាករវ័យ៣៦ឆ្នាំរូបនេះមិនអាចធ្វើអ្វីច្រើនទេក្នុងការប្រកួត ហើយថែមទាំងចប់ប្រកួតភ្លាម ដើរចូលក្នុងបន្ទប់ផ្លាស់សំលៀកបំពាក់ភ្លាមទៀត ដោយមិនបាននៅទះដៃអរគុណដល់អ្នកគាំទ្រដែលបានមកចូលទស្សនាជាមួយកីឡាករដទៃទៀតទេ។
រឿងនេះហើយ បានធ្វើឱ្យលោក Neville ដែលជាអតីតកីឡាករ Man Utd ម្នាក់ចេញមុខមករិះគន់ទៅលើ Ronaldo ជាខ្លាំង។ លោក បានចាត់ទុកទង្វើរនេះជាទង្វើរដែលមិនផ្ដល់តម្លៃឱ្យអ្នកគាំទ្រ ហើយវាក៏បានកើតឡើងប្រមាណជា២ខែមកហើយ។ CR7 គួរតែនៅអរគុណអ្នកគាំទ្រ ព្រោះវាជាពេលដែលសំខាន់បំផុត ដើម្បីលើកទឹកចិត្តក្រុមក៏ដូចជាអ្នកគាំទ្រដែលបានចំណាយពេលមកទស្សនា៕ ប្រភព៖ DAILYMAIL