អនាគតរបស់ Harry Kane នៅតែមិនទាន់ដាច់ស្រេចជាមួយក្លឹប Tottenham Hotspur ជារួមមក គឺកីឡាករហាក់នៅតែមានចិត្តចង់ដើរចេញ ហើយនៅទីផ្សារដោះដូរខាងមុខ ក៏ជាពេលវេលាដែលអាចធ្វើឲ្យការផ្ទេរ សម្រេចទៅបានផងដែរ។
ក្នុងចំណោមក្លឹបយក្សជាច្រើន ក៏មាន Man City ដែលតាមចរចា លើការនាំយកកីឡាករអង់គ្លេសតាំងពីរដូវក្តៅ តែដោយសារ Spurs ដាក់តម្លៃខ្លួន Kane ខ្ពស់ជ្រុលដល់ ១៦០ លានផោន ទើបនាំឲ្យការផ្ទេរ មិនអាចសម្រេចទៅបាន។
យ៉ាងណាសារនេះ ស្របពេលដែលសាមីខ្លួនរំអុកក្លឹបកាន់តែខ្លាំង អំពីការចង់ចែកផ្លូវ ដូច្នេះតម្លៃខ្លួនរបស់គេ ក៏អាចជាធ្លាក់ចុះជាងមុនផងដែរ ខណៈ ដែលក្លឹបអាណាព្យាបាលក៏អស់ការអត់ធ្មត់ លែងចង់ហាមឃាត់ចិត្តគេក៏តទៅទៀតដែរ។ បើតាមសារព័ត៌មាន El Nacional ចុះផ្សាយថា ក្រុមដឹកនាំដោយលោក Pep Guardiola នៅតែស្រលាញ់គុណភាពកីឡាករវ័យ ២៨ ឆ្នាំ ហើយចង់សាកល្បងចរចាជាថ្មី នៅខែមករាខាងមុខ។
តែយ៉ាងណា កីឡាករផ្ទាល់ ហាក់បាក់ចិត្តទៅលើក្លឹបយក្ស Real Madrid ជាង គ្រាន់ថាភាគរយផ្ទេរទៅក្លឹបអេស្ប៉ាញ គឺមានទាប ព្រោះអីប្រធានក្លឹប Florentino Perez បានមានគោលដៅរួចរាល់ហើយ ថានឹងនាំយករវាង Erling Haaland ឬ Kylian Mbappe ពោលមិនមាន Kane ក្នុងបញ្ជីកីឡាករត្រូវនាំចូលនោះទេ។ ដូច្នេះយើងនឹងរង់ចាំមើលថា City អាចអូសទាញចិត្ត Kane ឲ្យផ្ទេរមកទឹកដី Etihad បានឬយ៉ាងណា? ប្រភព៖ El Nacional