អ្នកចាត់ការក្រុមជម្រើសជាតិអង់គ្លេស លោក Gareth Southgate បានសម្រេចព្រមព្រៀងលើការបន្តកុងត្រាថ្មី រយៈពេល ២ ឆ្នាំបន្ថែម លើសុពលភាពកុងត្រាចាស់ ពោលគឺដល់ថ្ងៃទី ៣១ ឆ្នូ ឆ្នាំ ២០២៤។
កុងត្រាចាស់របស់ Southgate ត្រូវផុតនៅក្រោយចប់ព្រឹត្តិការណ៍ World Cup 2022 ក្នុងប្រទេសកាតា តែឥឡូវគឺអាចធានាពីតំណែងរបស់លោកដល់ផុត ទាំងក្រោយចប់ព្រឹត្តិការណ៍ Euro 2024 ទៅទៀត។ សម្រាប់ជំនួយការរបស់ Southgate លោក Steve Holland ក៏ព្រមព្រៀងលើកុងត្រាថ្មីសារនេះដែរ។
បើតាមការបញ្ជាក់របស់ Southgate បានឲ្យដឹងថា៖ “ខ្ញុំរីករាយដែល Steve និងខ្ញុំ អាចបន្តការឈរជើងជាមួយតំណែងរបស់យើង ដោយនេះជាឱកាសល្អ ក្នុងការបង្កើតសមិទ្ធផលជោគជ័យសម្រាប់អ្នកគាំទ្ររបស់យើងទៅថ្ងៃអនាគត”។
គួរបញ្ជាក់ថា Southgate បានចូលមកដឹកនាំ ជម្រើសជាតិអង់គ្លេស បន្តពីលោក Sam Allardyce តាំងពីចុងឆ្នាំ ២០១៦។ ជោគជ័យធំៗ ដែលលោកសម្រេចបាន គឺដូចជាការត្រួសត្រាយឲ្យតោកំណាចឡើងដល់វគ្គ ៤ ក្រុមនៅ World Cup 2018 ហើយកាលពី Euro កន្លងទៅ ក៏បានឡើងដល់វគ្គផ្តាច់ព្រ័ត្រផងដែរ៕
ប្រភព៖ Metro