អ្នកចាត់ការថ្មីរបស់ក្លឹប Barcelona គឺលោក Xavi Hernandez បានបញ្ជូនសំណើទៅកាន់ថ្នាក់លើក្លឹបហើយ អំពីការចង់បានកីឡាករមួយគូនៅក្លឹបតោខៀវ Chelsea នោះគឺរួមមាន Andreas Christensen និង Cesar Azpilicueta នៅរដូវក្តៅ ឆ្នាំ ២០២២។
ខ្សែការពារទាំងពីររូប ជាការពិតពួកគេនឹងក្លាយជាកីឡាករឥតតម្លៃផ្ទេរ ក្រោយបញ្ចប់រដូវកាល ប្រសិនកំឡុងពេលខាងមុខនេះ ពុំមានការបន្តកុងត្រាថ្មីណាមួយកើតឡើង។ សម្រាប់ Xavi ជាគ្រូថ្មី ជឿថា នេះជាយុទ្ធសាស្រ្តយកបានកីឡាករល្អមកក្នុងក្រុមដោយមិនចាំបាច់ចំណាយ ហើយគោលដៅទាំងពីរ គឺសក្តិសមនឹងប្រព័ន្ធដឹកនាំរបស់លោក។ នេះបើតាមសារព័ត៌មាន Daily Express បានចុះផ្សាយ។
យ៉ាងណាមិនច្បាស់ថា Barcelona អាចប្រើប្រាស់វិធីសាស្រ្តអ្វីក្នុងការអូសទាញចិត្ត ខ្សែការពារកំពូលទាំងពីរបាននោះទេ ព្រោះបច្ចុប្បន្នក្លឹបកំពុងជាប់បំណុលដល់ទៅ ១ ពាន់លានផោន ដូច្នេះការចរចាយកកីឡាករថ្មី ហើយចង់ឲ្យតម្លៃពលកម្មខ្ពស់ក៏ជារឿងពិបាកដែរ។ វាអាចកើតឡើងលុះត្រាណាតែក្លឹបសម្រួលបន្ទុកចំណាយ តាមរយៈការលក់ចេញកីឡាករមួយចំនួន នៅរដូវរងាខាងមុខ៕
ប្រភព៖ Daily Express