លើសុពលភាពកុងត្រារយៈពេលជាង ២ ឆ្នាំ សម្រាប់ Lionel Messi នៅក្លឹបបារាំង Paris Saint-Germain អាចទទួលបានថ្លៃពលកម្ម ជាង ៦១២ ០០០ ផោន/សប្តាហ៍ ស្របពេលដែល Cristiano Ronaldo នៅក្លឹប Man Utd លើកុងត្រាថ្មីនោះ គេជាកីឡាករស៊ីថ្លៃបំផុតនៅ PL ស្មើនឹងកម្រិតរបស់ Kevin de Bruyne គឺ ៣៨៥ ០០០ ផោន/សប្តាហ៍។
យ៉ាងណាឈ្មោះតារាឆ្នើមទាំងពីរខាងលើ បើធ្វើការប្រៀបធៀបទៅនឹងកីឡាករនៅឯស្រុកចិន គឺនៅចាញ់ឆ្ងាយ ពោលគឺ Ronaldo អាចឈរត្រឹមលេខ ៤ ខណៈ Messi បានត្រឹមលេខ ៣ ធៀបនឹងបញ្ជីកីឡាករស៊ីថ្លៃខ្ពស់បំផុតទាំង ១០ ប្រចាំលីគកំពូលប្រទេសចិន ឬហៅកាត់ CSL៖
១០) Marouane Fellaini ក្លឹប Shangdon Luneng
កីឡាករបែលហ្សិកបានចាកចេញពីក្លឹប Man Utd មកចូលរួមនៅក្លឹបក្នុងប្រទេសចិន កាលពីឆ្នាំ ២០១៩ ហើយតាមដំណឹងគឺគេអាចទទួលបានថ្លៃពលកម្មប្រហែល ២០៥ ០០០ ផោន/សប្តាហ៍ ឬជាង ១០,៥ លានផោន/ឆ្នាំ។
៩) Eder ក្លឹប Jiangsu
នៅរដូវក្តៅ ឆ្នាំ ២០១៨ Eder បានចាកចេញពី Inter Milan មកចូលរួមនៅក្លឹបក្នុងប្រទេសចិន ហើយពេលកំឡុងការចាយពេលជាង ២ ឆ្នាំ គេបង្ហាញខ្លួន ៦០ ប្រកួត រកបាន ៣២ គ្រាប់។ ប្រាក់ពលកម្មគេទទួលបានកាលនោះ គឺ ២១៣ ០០០ ផោន/សប្តាហ៍។
៨) Paulinho ក្លឹប Guangzhou Evergrande
កីឡាករប្រេស៊ីល ក៏ធ្លាប់បានចាយពេល ២ ឆ្នាំនៅក្លឹបក្នុងប្រទេសចិន ចន្លោះឆ្នាំ ២០១៥ ដល់ ២០១៧ ហើយដល់ឆ្នាំ ២០១៨ ក៏ត្រលប់មកវិញជាថ្មី ជាមួយថ្លៃពលកម្ម ២៣០ ០០០ ផោន/សប្តាហ៍។
៧) Stephan El Shaarawy ក្លឹប Shanghai Shenhua
នៅរដូវក្តៅ ឆ្នាំ ២០១៩ អតីតខ្សែប្រយុទ្ធស្លាបក្លឹប AC Milan បានផ្ទេរមកចូលរួមនៅក្របខ័ណ្ឌ Chinese Super League ជាមួយតម្លៃពលកម្ម ២៤៧ ០០០ ផោន/សប្តាហ៍។ យ៉ាងណាគេមិនទទួលបានជោគជ័យទេ ហើយរកបានតែ ៤ គ្រាប់គត់ រួចដល់ខែមករា ឆ្នាំ ២០២១ ក៏ប្រកាសចែកផ្លូវ។
៦) Graziano Pelle ក្លឹប Shangdong Luneng
បន្ទាប់ពីបង្ហាញទម្រង់លេងបានល្អនៅក្លឹបក្នុងតំបន់អឺរ៉ុប នៅឆ្នាំ ២០១៦ Pelle ក៏បានផ្ទេរមករួមក្លឹបក្នុងប្រទេសចិន ជាមួយតម្លៃពលកម្មដល់ទៅ ២៦៣ ០០០ ផោន/សប្តាហ៍។
៥) Hulk ក្លឹប Shanghai SIPG
នៅរដូវក្តៅ ឆ្នាំ ២០១៦ ក្លឹបនៅប្រទេសចិនបានចាយលុយ ៤៧ លានផោន ថ្ពក់យក Hulk ចេញពីក្លឹបនៅអឺរ៉ុប មកកាន់ក្លឹបនៅប៉ែកអាស៊ី។ មុនការចាកចេញនៅឆ្នាំ ២០២០ កីឡាករប្រេស៊ីលក៏រកបាន ៧៧ គ្រាប់ឲ្យក្លឹបផងដែរ ជាមួយថ្លៃពលកម្ម ៣២០ ០០០ ផោន/សប្តាហ៍។
៤) Cedric Bakambu ក្លឹប Beijing Guoan
នៅកាលបរិច្ឆេទកៀកនឹងបិទទីផ្សារដោះដូររដូវរងា ឆ្នាំ ២០១៨ Bakambu ក៏បានសម្រេចដើរចេញពីក្លឹប Villarreal និងផ្ទេរមកលេងនៅប្រទេសចិន ជាមួយថ្លៃពលកម្ម ៣៤១ ០០០ ផោន/សប្តាហ៍។
៣) Oscar ក្លឹប Shanghai SIPG
អតីតកីឡាករក្លឹបតោខៀវ Chelsea បានផ្ទេរចេញពីទឹកដី Stamford Bridge មករួមក្លឹបនៅប្រទេសចិន នាឆ្នាំ ២០១៧ ជាមួយតម្លៃផ្ទេរសារនោះ ក៏ខ្ពស់ដល់ទៅ ៦០ លានផោន។ បង្វែរមកមើលថ្លៃពលកម្មរបស់ Oscar ក៏មិនទាបនោះដែរ ពោលគឺទទួលបាន ៥០០ ០០០ ផោន ឬកន្លះលានផោន/សប្តាហ៍។
២) Carlos Tevez ក្លឹប Shanghai Shenhua
អ្នកគាំទ្រ Man Utd ប្រហែលជាមិនបានដឹងនោះទេ ថាអតីតវីរបុរស Tevez ធ្លាប់ជាកីឡាករស៊ីថ្លៃដាច់គេលំដាប់ទី ២ នៅក្នុងលោក។ កីឡាករអាហ្សង់ទីន នាំមុខតម្លៃពលកម្មទាំងលើ Messi/Ronaldo ទៅទៀត ពោលគឺទទួលបាន ៦៣៤ ៦១៥ ផោន/សប្តាហ៍។ សោកស្តាយ Tevez បានឈរជើងជាមួយក្លឹបក្នុងប្រទេសចិន តែ ១ ឆ្នាំប៉ុណ្ណោះ ហើយឥឡូវកំពុងទំនេរជើង តែមិនទាន់ចូលនិវត្តនៅឡើយ។
១) Ezequiel Lavezzi ក្លឹប Hebei China Fortune
បើតាមសារព័ត៌មាន Football Leaks និងការចែករំលែកបន្តពីទំព័រល្បីឈ្មោះ B/R Football បានទទួលស្គាល់ថា កីឡាករអាហ្សង់ទីន Lavezzi ធ្លាប់ដើរតួជាអត្តពលិកក្នុងវិស័យបាល់ទាត់ ដែលទទួលបានថ្លៃពលកម្មខ្ពស់ដាច់គេ ដល់ទៅ ៧៩៨ ០០០ ផោន/សប្តាហ៍។
បុរសវ័យ ៣៦ ឆ្នាំ បានឈរជើងឲ្យក្លឹបខាងលើ ចន្លោះឆ្នាំ ២០១៦ ដល់ ២០២០ មុនប្រកាសចូលនិវត្ត៕
ប្រភព៖ Football Leaks