Sven Ulreich អ្នកចាំទីរបស់ក្រុម Bayern Munich បានរំលឹកដល់១គ្រាប់ដែលខ្លួនបានបង្កកំហុស ធ្វើឱ្យ Benzema មានឱកាសរកគ្រាប់បាល់ជ័យជម្នះលើខ្លួនបាន នាការប្រកួតវគ្គពាក់កណ្ដាលផ្ដាច់ព្រ័ត្រ UEFA Champions League ។
អ្នកចាំទីដៃទី២របស់ក្រុមជើងឯកអាល្លឺម៉ង់ខាងលើបាននិយាយថា១គ្រាប់នោះ ខ្លួនមិនអាចបំភ្លេចបានឡើយ។ វាជាកំហុសដែលកើតឡើងដោយខ្លួនឯងជាធ្វើវា។ កាលគ្រានោះ រូបគេប្រឹងលោតទៅចាប់បាល់ ប៉ុន្តែភ្លាមៗ ទើបនឹកឃើញថាបាល់នេះមិនអាចចាប់បានទេ ទើបសម្រេចយកជើងឈូសចេញវិញតែម្ដង។ តែគួរឱ្យសោកស្ដាយ បាល់លឿនផុតជើង ធ្វើឱ្យមានឱកាសសម្រាប់Benzema ស៊ុតបញ្ចូលទីតែម្ដង។
Ulreich បានបន្ដថានេះជាកំហុសធំបំផុតក្នុងអាជីពរបស់ខ្លួន ខណៈដែលពេញ១រដូវកាលមកនេះ មិនដែលធ្វើអ្វីខុសអីចឹងនោះទេ។ ត្បិតតែយ៉ាងនេះក្ដី អ្នកចាំទីវ័យ២៩ឆ្នាំនេះ បានបញ្ជាក់ថាក្រោយពីសមាជិកក្រុមបានផ្ដល់កម្លាំងចិត្តជាច្រើនមក ពេលនេះរូបគេបានធូរចិត្តបន្តិចហើយ៕
