ក្លឹបបារាំង Paris Saint-Germain នៅរដូវក្តៅ ឆ្នាំ ២០២១ បានធ្វើឲ្យអ្នកគាំទ្របាល់ទាត់មានការភ្ញាក់ផ្អើលជាខ្លាំង ព្រោះក្លឹបបានប្រមូលយកកីឡាករឆ្នើមតាំងពីតំណែងអ្នកចាំទី រហូតមកដល់តំណែងប្រយុទ្ធ ហើយចាយលុយសុទ្ធ មិនស្មើនឹងការផ្ទេរ Jadon Sancho មកកាន់ក្លឹប Man Utd ម្នាក់ផង។
ទំព័រ CTS Sports សូមសង្ខេបបង្ហាញត្រួសៗនៅការផ្ទេរចូលរបស់កីឡាករថ្មីទាំង ៦ រូប មុនទៅបង្ហាញបញ្ជីថ្លៃពលកម្មនៃកីឡាករស៊ីថ្លៃទាំងទាំង ១០ ប្រចាំក្លឹបបារាំង PSG៖
អ្នកចាំទី Gianluigi Donnarumma – ក្រោយចាយពេល ៨ ឆ្នាំនៅក្លឹប AC Milan ទីបំផុត Donnarumma បានសម្រេចការផ្ទេរនៅលក្ខខណ្ឌឥតតម្លៃខ្លួន មកកាន់ក្លឹប PSG ក្រោយតែរយៈពេលប៉ុន្មានថ្ងៃនៃការលើកពាន Euro 2020 ជាមួយក្រុមជម្រើសជាតិអ៊ីតាលី។ បុរសវ័យ ២២ ឆ្នាំនឹងប្រជែងតំណែងអ្នកចាំទីដៃទីមួយ ជាមួយ Keylor Navas ដែលបានរួមជើងនៅ PSG រយៈពេលជាង ២ ឆ្នាំមកហើយ។
ខ្សែការពារកណ្តាល Sergio Ramos – ដូចគ្នាទៅនឹង Donnarumma សម្រាប់ Ramos ក្រោយផុតកុងត្រាជាមួយក្លឹបយក្សអេស្ប៉ាញ Real Madrid លោកក៏ជ្រើសយកការផ្ទេរមកកាន់ក្លឹប PSG ដោយឥតតម្លៃខ្លួន ហើយគេជឿថា លោក Mauricio Pochettino នឹងដាក់កីឡាករអេស្ប៉ាញរូបនេះ ឲ្យចាប់ដៃគូជាមួយប្រធានក្រុម Marquinhos។
ខ្សែការពារស្លាប Achraf Hakimi – នេះជាកីឡាករដែល PSG ចាយក្រែលបំផុតហើយនៅរដូវក្តៅ ដោយក្លឹបបានទូទាត់ឲ្យ Inter Milan ប្រមាណ ៥៤ លានអឺរ៉ូ។ ខ្សែការពារកំពូលល្បឿន និងពូកែខាងវាយសម្រុកតំបន់ស្លាប ជាប់សុពលភាពកុងត្រារយៈពេល ៥ ឆ្នាំជាមួយនឹង PSG។
ខ្សែបម្រើការពារ Danilo Pereira – គ្រប់គ្នាច្រឡំថា PSG យកបាន ៥ រូបនៅរដូវក្តៅ តែការពិតគឺ ៦ រូប ដោយម្នាក់ទៀតគឺជាអតីតកីឡាកររបស់ FC Porto ដែលក្លឹបចរចាយកបានកាលពីដើមខែកក្កដា។ PSG ចាយ ១៦ លានអឺរ៉ូ យក Danilo លើកុងត្រាដល់ឆ្នាំ ២០២៥។ យ៉ាងណាតំណែងបម្រើការពាររបស់ Danilo អាចជានឹងពិបាកបន្តិច ក្នុងការប្រជែងជាមួយ Marco Verratti ដែលជាកីឡាករមានទេពកោសល្យ និងទទួលបានការជឿជាក់ពីគ្រូស្រាប់នោះ។
ខ្សែបម្រើ Georginio Wijnaldum – ចាយពេល ៥ ឆ្នាំនៅ Liverpool ទីបំផុតកីឡាករហូឡង់ ក៏បានសម្រេចការផ្ទេរមកក្លឹបមានមូលដ្ឋានក្នុងទីក្រុងប៉ារីស ដោយលក្ខខណ្ឌឥតតម្លៃខ្លួន។ ជាមួយសុពលភាពកុងត្រា ៣ ឆ្នាំ សម្រាប់ Wijnaldum បានទទួលឱកាសនៅការបង្ហាញខ្លួនជម្រើសដំបូងរួចរាល់ហើយ សម្រាប់ការប្រកួតជុំទី ១ ប៉ះ Troyes កន្លងទៅ។
ខ្សែប្រយុទ្ធ Lionel Messi – ជាគ្រាប់ពេជ្រថ្មី ដែលទើបសម្រេចការផ្ទេរមក PSG នឹងធ្វើឲ្យវិស័យបាល់ទាត់បារាំង ហាក់មានសន្ទុះខ្លាំងឡើងនៅប្រជាប្រិយភាពពីអ្នកគាំទ្រទូទាំងសកលលោក។ ការផ្ទេររបស់ Messi សារនេះ PSG ចំណេញលើថ្លៃផ្ទេរ ដោយយកបានក្នុងលក្ខខណ្ឌឥតតម្លៃខ្លួន ហើយចរចាត្រឹមថ្លៃពលកម្ម លើសុពលភាព ២ ឆ្នាំប៉ុណ្ណោះ។
ខាងក្រោមយើងបង្ហាញ បញ្ជីកីឡាករស៊ីថ្លៃបំផុតទាំង ១០ នៅក្លឹប PSG៖
Georginio Wijnaldum ទទួលបាន ១០ លានអឺរ៉ូ/ឆ្នាំ
Sergio Ramos ទទួលបាន ១២ លានអឺរ៉ូ/ឆ្នាំ
Gianluigi Donnarumma ទទួលបាន ១២ លានអឺរ៉ូ/ឆ្នាំ
Keylor Navas ទទួលបាន ១២ លានអឺរ៉ូ/ឆ្នាំ
Angel di Maria ទទួលបាន ១៤ លានអឺរ៉ូ/ឆ្នាំ
Marco Verrati ទទួលបាន ១៥ លានអឺរ៉ូ/ឆ្នាំ
Marquinhos ទទួលបាន ១៥ លានអឺរ៉ូ/ឆ្នាំ
Mbappe ទទួលបាន ២៤ លានអឺរ៉ូ/ឆ្នាំ
Neymar ទទួលបាន ៣០ លានអឺរ៉ូ/ឆ្នាំ
Messi ទទួលបាន ៣៥ លានអឺរ៉ូ/ឆ្នាំ