ជាទូទៅឲ្យតែកីឡាករណាដែលបានចាយពេលកាន់ឆ្នាំនៅក្លឹបទោល ហើយអាចបង្កើតផ្លែផ្កាជោគជ័យជួយឲ្យក្លឹបឈ្នះរង្វាន់ជាច្រើននោះ ក៏ពួកគេរមែងទទួលបានការតបស្នងដ៏លើសលប់ត្រលប់មកវិញ កំឡុងពេលចុងបញ្ចប់នៃអាជីព។
ជាក់ស្តែងក្លឹបខ្លះទៅ ក៏បានកសាងរូបសំណាកនៅមុខកីឡដ្ឋាន ខ្លះប្តូរឈ្មោះកីឡដ្ឋានទៅតាមឈ្មោះវីរបុរសឆ្នើមដែលពួកគេគោរព និងខ្លះដាក់លេខអាវដែលវីរបុរសនោះធ្លាប់ប្រើប្រាស់ឲ្យចូលនិវត្ត លែងមានអ្នកស្នងជារៀងរហូត។
នៅក្នុងអត្ថបទនេះ យើងរំឭកលើកមកបង្ហាញនៅលេខអាវទាំង ៥ របស់អតីតកីឡាករបាល់ទាត់កំពូល ដែលត្រូវបានក្លឹបប្រកាសដាក់ឲ្យចូលនិវត្ត ហើយនៅចុងអត្ថបទ យើងនឹងបង្ហើបពីហេតុផលដែល Barcelona មិនអាចធ្វើបែបនេះបាន សម្រាប់លេខអាវរបស់ Lionel Messi៖
៥) Javier Zanetti អាវលេខ ៤ នៅក្លឹប Inter Milan
ចាយពេលជិត ២ ទសវត្សនៅក្លឹបយក្សរបស់អ៊ីតាលី Zanetti បង្ហាញខ្លួនសរុប ៨៥៨ ប្រកួតច្រើនជាងកីឡាករណាៗទាំងអស់។ ខ្សែការពារស្លាបសញ្ជាតិអាហ្សង់ទីន ក៏ជាចំណែកជួយឲ្យ Inter ឈ្នះពាន ៣ កាលពីឆ្នាំ ២០១០ ដោយបានលេងច្រើនជាង ៥០ ប្រកួតនៅរដូវកាលទោល។
ក្រោយប្រកាសចូលនិវត្តនៅឆ្នាំ ២០១៤ ក្លឹបមានមូលដ្ឋានក្នុងទីក្រុង Milan ក៏សម្រេចប្រកាសថាអាវលេខ ៤ នឹងត្រូវចូលនិវត្ត ដើម្បីតំណាងពីវត្តមាន Zanetti ដូចកំពុងឈរជើងឲ្យក្លឹបជារៀងរហូត។
៤) Paolo Maldini អាវលេខ ៣ នៅក្លឹប AC Milan
Maldini ចាយពេល ២៥ រដូវកាលលេងច្រើនជាង ៩០០ ប្រកួតឲ្យក្លឹប AC Milan។ លោកឈ្នះពានរង្វាន់សរុប ២៦ លើក រួមមាន Serie A ៧ លើកនិង Champions League ៣ លើក។
មុនឈានចូលអាយុ ៤១ ឆ្នាំ Maldini ក៏សម្រេចប្រកាសចូលនិវត្តពីអាជីពជាកីឡាករបាល់ទាត់ ហើយអាវលេខ ៣ របស់លោកក៏ទៅព្រមគ្នា ដែលជាការសម្រេចរបស់ក្លឹប AC Milan ដើម្បីជាការគោរពដឹងគុណដល់ការលះបង់របស់បុរសសញ្ជាតិអ៊ីតាលី។
៣) Johan Cruyff អាវលេខ ១៤ នៅ Ajax
មកទល់ពេលនេះ ដូចអ្នកបានឃើញស្រាប់ហើយ ក្លឹប Ajax មិនមានកីឡាករណាដែលមានសិទ្ធអាចប្រើប្រាស់អាវលេខ ១៤ បាននោះទេ ព្រោះជាលេខអាវដែលក្លឹបប្រកាសឲ្យលែងប្រើប្រាស់ជាកំហិត ដើម្បីជាការដឹងគុណដល់អតីតវីរបុរសលោក Johan Cruyff។
បុរសសញ្ជាតិហូឡង់ បានចាយពេលនៅ Ajax ចន្លោះឆ្នាំ ១៩៦៤ ដល់ ១៩៧៣ ហើយត្រលប់មកចូលរួមម្តងទៀតនៅឆ្នាំ ៨១ ដល់ ៨៣។ យ៉ាងណារហូតមកទល់ឆ្នាំ ២០០៧ ក្លឹបក៏សម្រេចដាក់អាវលេខ ១៤ ទៅក្នុងបញ្ជីលេខអាវចូលនិវត្ត ហើយគ្មានអ្នកស្នងមកទល់បច្ចុប្បន្ន។
២) Diego Maradona អាវលេខ ១០ នៅ Napoli
វីរបុរសអាហ្សង់ទីន Maradona បានចាយពេលជាមួយក្លឹបច្រើនជាង ៤ ក្នុងអាជីព តែសមិទ្ធផលជោគជ័យធំដែលលោកសម្រេចបាន គឺកាលនៅក្លឹប Napoli ចន្លោះឆ្នាំ ១៩៨៣ ដល់ ១៩៩១។ វាក៏ស្ថិតក្នុងចន្លោះពេលដែលអាហ្សង់ទីន លើកពាន FIFA World Cup ចុងក្រោយបង្អស់ផងដែរ។
Maradona ដែលជា Playmaker ពោរពេញដោយទេពកោសល្យមួយរូប បើទោះបីធ្លាប់ជាមនុស្សប្រើប្រាស់ថ្នាំញៀន តែក្លឹប Napoli ក៏នៅតែគោរពឲ្យតម្លៃ ហើយសម្រេចចូលនិវត្តអាវលេខ ១០ មកទល់សព្វថ្ងៃ។ មិនត្រឹមតែប៉ុណ្ណឹងទេ ក្រោយការទទួលមរណភាពរបស់លោកកាលពីឆ្នាំទៅ ក្លឹប Napoli ក៏សម្រេចប្តូរឈ្មោះកីឡដ្ឋានមកជា Estadio Diego Armando Maradona ថែមទៀតផង។
១) Pele អាវលេខ ១០ នៅ New York Cosmos
ក្នុងអាជីពរបស់ Pele ទាំងនៅក្លឹបបូកជម្រើសជាតិ លោករកបានច្រើនជាង ១០០០ គ្រាប់។ នៅអាយុ ៣៥ ឆ្នាំ បន្ទាប់ពីចាយពេលជិត ២ ទសវត្សឲ្យក្លឹបប្រេស៊ីល Santos លោកក៏បានផ្ទេរមកក្លឹប New York Cosmos បាន ២ ឆ្នាំមុនប្រកាសចូលនិវត្ត។
ដ្បិតស្ថិតនៅរយៈពេលខ្លី តែ Pele បានទទួលការគោរពពេញទំហឹង ពីសំណាក់ក្លឹបនៅសហរដ្ឋអាមេរិក ដោយ New York Cosmos ក៏ប្រកាសព្យួរអាវលេខ ១០ មិនឲ្យមាននរណាពាក់បន្តពី Pele ផងដែរ។
គួរបញ្ជាក់ថា សម្រាប់ករណីរបស់ Lionel Messi ឯណេះវិញ មូលហេតុដែលក្លឹប Barcelona មិនអាចដាក់អាវលេខ ១០ ឲ្យចូលនិវត្តបាននោះក៏ដោយសារតែច្បាប់របស់ La Liga ដែលចែងថា ក្លឹបទាំងអស់ចាំបាច់ត្រូវតែមានបញ្ជីកីឡាករប្រើប្រាស់លេខអាវពី ១ ដល់ ២៥ ជាកំហិត ដូច្នេះបើលេខក្រោយពី ២៥ ឧទាហរណ៍៖ ២៦ ឡើងទៅ គឺក្លឹបអាចមានសិទ្ធដាក់ឲ្យចូលនិវត្តបាន៕
ប្រភព៖ បរទេស