តាមការសិក្សាមួយបានបញ្ជាក់ថាក្រុមជម្រើសជាតិអេស្ប៉ាញមានភាគរយខ្ពស់ក្នុងការឈ្នះពានរង្វាន់ FIFA World Cup 2018 ខាងមុខនេះ។
ការសិក្សានោះផ្ដោតទៅលើនាទីរបស់កីឡាករជាប់ជម្រើសជាតិម្នាក់ៗបានលេងនៅក្លឹបអាជីពរបស់ខ្លួន កម្រិតក្លឹបដែលពួកគេលេង និងសមត្ថភាពផ្ទាល់ខ្លួនរបស់កីឡាករម្នាក់ៗ។ ជាលទ្ធផលចេញមកគឺ អេស្ប៉ាញទទួលបានពិន្ទុដល់ទៅ ១០០ ពេញ នាំមុខបណ្ដាប្រទេសខ្លាំងៗផ្សេងទៀត។ សូម្បីតែប្រេស៊ីលដែលជាក្រុមខ្លាំងមួយនោះ ក៏ស្ថិតក្រោមអេស្ប៉ាញដែរ។
ក្រុមដែលសង្ឃឹមតិចជាងគេ ក្នុងការឈ្នះកម្មវិធីខាងមុខ គឺ ប៉ាណាម៉ាដែលនឹងត្រូវលេង World Cup ជាលើកដំបូងក្នុងប្រវត្តិសាស្ត្រខ្លួន។ ក្រុមជម្រើសជាតិអាមេរិកកណ្ដាលរូបនេះ មានត្រឹមតែ ១២ពិន្ទុ ប៉ុណ្ណោះ។
ព្រឹត្តិការណ៍ World Cup នៅរុស្ស៊ីនឹងឈានចូលមកដល់នៅថ្ងៃទី១៤ ខែមិថុនាឆ្នាំ២០១៨ខាងមុខនេះហើយ។ ក្រុមអេស្ប៉ាញនៅពូល B ជាមួយក្រុមអឺរ៉ង់ ម៉ូរុកកូ និងព័រទុយហ្គាល់៕